«Aq jol» demokratııalyq partııasy usynǵan prezıdenttikke kandıdat Danııa Espaeva men saılaýaldy respýblıkalyq shtab jetekshisi Azat Perýashev Nur-Sultan qalasyndaǵy gýmanıtarlyq-zań kolledjinde jas saılaýshylarmen kezdesti. Kolledjde zańger, aýdarmashy, muǵalim mamandyqtary boıynsha shamamen 500 stýdent tálim alady. Oqý orny byltyrdan bastap bastaýysh synyp muǵalimderi men balabaqsha tárbıeshilerin oqyta bastaǵan. Oǵan memleket 200-deı shákirtaqy bólgen. Kandıdatqa kadr jetispeýshiligin sheshý úshin shákirtaqy sanyn 270-ke arttyrý kózdelgeni aıtyldy. Stýdentter arasynda basqa qaladan kelip oqıtyndar sany kóp bolǵanymen, hosteldegi tegin oryndar sany 30 adamǵa ǵana shaqtalǵan eken. Aldaǵy jyldary óńirlerden kelgender úshin jataqhana salý josparlanyp otyr.
Jıynda D.Espaeva óziniń saılaýaldy baǵdarlamasyn keńinen tanystyrdy. Jastar jaǵy turǵyn úımen qamtamasyz etý, jolaqynyń qymbattyǵy, jumyspen qamtamasyz etý sııaqty ózderin mazalaǵan máselelerin jetkizdi. «Maǵan jastardyń oılaryn ashyq jetkizetini unady. Saıası saýatty ekenderi kórinip tur. Olar menen ne sebepti saılaýǵa qatysyp otyrǵanymdy jáne áıel adamnyń prezıdent bolýy qanshalyqty múmkin ekenin surady. Árıne oǵan meniń jaýabym daıyn. Biraq jastardyń, stýdentterdiń eldegi saıası ahýalǵa, kele jatqan prezıdenttik saılaýǵa kóńil bólýi – qýantarlyq», dedi D.Espaeva.
«Aq jol» partııasynyń úmitkeri bolashaq zańgerlerge zańgerlik mamandyqqa qosa ekonomıkalyq bilim alýǵa keńes berdi. Stýdentter men oqytýshylardy baǵdarlamadaǵy bıznesti qoldaý bastamalary qyzyqtyrdy. Onda kandıdat óz isin jańa bastaǵan kásipkerlerge qosymsha qun salyǵy mólsherlemesin tómendetip, nesıeni qoljetimdi etýdi usynyp otyr. D.Espaevanyń respýblıkalyq shtaby jaqyn arada Soltústik Qazaqstan jáne Pavlodar oblystaryna jol tartpaq.
* * *
«Aýyl» halyqtyq-demokratııalyq patrıottyq partııasynan prezıdenttikke kandıdat Tóleýtaı Raqymbekov Batys Qazaqstan oblysyna atbasyn buryp, óńirdegi sharýa qojalyqtaryn aralady. Kandıdat aýyl sharýashylyǵy salasynda eńbek etip júrgen mamandarmen kezdesip, saılaýaldy baǵdarlamasyn tanystyrdy.
Terekti aýdanyna qarasty «Aqas» sharýa qojalyǵynda 1400-den asa aqbas sıyr bar. Bul – jergilikti klımatqa ábden beıimdelgen etti tuqym. Iаǵnı, mundaǵy iri qaralardyń ortasha salmaǵy 550 kılo tartady. Eshqandaı hımııa qoldanylmaıdy. Jaıylymda júrip salmaq jınaıdy. Prezıdenttikten úmitker T.Raqymbekov qyrýar qarjyǵa shetten mal satyp alǵansha, osy baǵyttaǵy sharýa qojalyqtaryna qoldaýdy kúsheıtý kerektigin jıi aıtady. «Osyndaı sharýa qojalyqtary aınaladaǵy eldi meken turǵyndaryn turaqty jumyspen qamtyp, aýyl tútinin óshirmeı otyr. Biraq sonyń ózinde eki qolǵa bir kúrek tappaı, qalaǵa qaraı sabylyp jatqan jastar kóp. Sondyqtan aýyldyń tynys-tirshiligin damytýǵa tyń serpin kerek. Qazir elimizdegi 7 mıllıonnan asa adam aýyldyq jerlerde turyp jatyr. Olardyń máselesine beıjaı qaraýǵa bolmaıdy. Kerisinshe, aýyl sharýashylyǵyn qoldaý arqyly el ekonomıkasyn ilgeriletý kerek», dedi kandıdat.
Kezdesý barysynda kandıdat aýyl turǵyndarynyń turmys-tirshiligimen etene tanysyp, shopandardyń áleýmettik jaǵdaıyn jaqsartý, shopan balalaryna tereń bilim beretin mektep-ınternattar ashý, shopan áıelderine ataýly áleýmettik kómekten bólek, laıyqty eńbekaqy tóleý máseleleri kóterildi. T.Raqymbekov maldy baǵyp, qaraı biletin azamattarǵa tıisti jaǵdaı jasaıtyn bolsaq, iri qaranyń basy ósip qana qoımaı, osy baǵytta elimizde eńbek ónimdiligi artatynyn aıtady. Mal basynyń artýy – sol aýyldyń, aýdannyń, oblystyń, aınalyp kelgende tutas el ekonomıkasynyń qarqyndy damýyna jarqyn jol ashady.
* * *
Kásipodaqtar federasııasy atynan prezıdenttik saılaýǵa túsip jatqan Amangeldi Taspıhovtyń respýblıkalyq saılaýaldy shtabynyń ókilderi Túrkistan oblysyna jumys saparymen bardy. Shtabtyń teń-jetekshisi, Kásipodaqtar Federasııasy tóraǵasynyń orynbasary Satybaldy Dáýletalın bastaǵan delegasııa úgit-nasıhat sharalaryn oblystyń jańa ortalyǵy Túrkistan qalasynan bastady.
Kıeli shahardaǵy jergilikti halyqty tirshilik nárimen qamtyp otyrǵan «Túrkistan-sý» memlekettik kásipornynda saılaýaldy kezdesý ótti. Jıynǵa 85 adam qatysty. Basqosýda sóz sóılegen aımaqtyq shtab basshysy Berik Bekjanov elimizde ótetin saılaýdyń mańyzdylyǵyna toqtaldy. Taǵdyrsheshti kezeńde enjar qalmaı, belsendi bolyp, turǵyndardy saılaýda óz tańdaýlaryn jasaýǵa shaqyrdy.
Al S.Dáýletalın jınalǵan qaýymǵa abyroıly uıym kásipodaq birlestikteriniń rólin, qyzmetin baıyptap túsindirdi. Eńbekkerlerdiń múddesi men quqyǵyn qorǵaıtyn mańyzdy qoǵamdyq ınstıtýttyń atqaryp jatqan qyrýar jumysyna toqtaldy. Kandıdat A.Taspıhovtyń eńbek jolyn, jetistikterin baıandap berdi. Sondaı-aq úmitkerdiń saılaýaldy tuǵyrnamasyndaǵy jumys berýshilerdiń jaýapkershiligin arttyrýǵa, etken eńbekke laıyqty jalaqynyń tólenýine, jumyskerlerge qaýipsiz jaǵdaı jasaýǵa qatysty oı-pikirlerin ortaǵa saldy. Jıynda «Túrkistan-sý» memlekettik kásipornynyń qyzmetkeri Seıilbek Daırabaı shtab múshelerine alǵysyn aıtyp, kásipodaq týraly oń kózqarasta ekenderin jetkizdi.
Sonymen qatar respýblıkalyq saılaýaldy shtaby búkil túrki jurtynyń áýlıesi Qoja Ahmet Iаsaýı kesenesine baryp, taǵzym jasady. Senim bildirilgen adamdar «Keleshek» jastar keńesi múshelerimen jáne eriktilermen kezdesip, emen-jarqyn suhbat qurdy. Saılaýaldy úgit-nasıhat sharalarynyń qaq ortasynda júrip, belsendilik tanytyp otyrǵan qyz-jigitterge alǵys bildirdi.
* * *
Qazaqstan Kommýnıstik halyq partııasynan prezıdenttikke kandıdat Jambyl Ahmetbekovtiń Jambyl oblystyq saılaýaldy shtaby Talas aýdanyna qarasty Qarataý kentindegi Mádenıet úıinde eńbek ujymdarymen kezdesti.
Jıynda kandıdattyń oblystyq shtabynyń jetekshisi Jarylqasyn Nuralıev partııanyń ınternasıonalızm men áleýmettik ádildik sııaqty basty ustanymdaryna toqtaldy. Ol qoǵamnyń damýy etnostar arasyndaǵy beıbitshilik pen kelisimge baılanysty ekenin aıtyp, saılaýaldy tuǵyrnamany jan-jaqty tanystyryp shyqty. «Adal eńbek qoǵam múddesi úshin!» dep urandatqan kommýnısterdiń ádiletsizdikke qarsy belsendi kúres júrgizetini aıtyldy.
Saılaýshylar prezıdenttikten úmitkerdiń saılaýaldy tuǵyrnamasynda kórsetilgen baǵyttardy jaqsy qabyldap, kókeılerinde júrgen suraqtaryn qoıdy. Olardyń deni jumyssyzdyq, tómen jalaqy, qaladaǵy sý máselesine qatysty boldy. Sońynda nasıhatshylar toby kópshilikti 9 maýsym kúni ótetin saılaýǵa belsene qatysyp, laıyqty úmitkerge daýys berýge shaqyrdy.
Sonymen qatar elimizdiń basqa óńirlerinde J.Ahmetbekovtiń kandıdatýrasyn qoldaýǵa úndegen túrli is-shara uıymdastyrylyp jatyr. Sonyń biri Nur-Sultan qalasynda elordalyq shtabtyń jetekshisi Nurdáýlet Orazhanovtyń Gýmanıtarlyq kolledjdiń professorlyq-oqytýshylar quramymen kezdesýi boldy. Onda jastar tárbıesine ınternettiń keıbir kontenti keri áser etetini, bul máseleni sheshýde bilim berý salasyn damytý mańyzdy ról atqaratyndyǵy aıtylyp, kedeılik jalaqynyń tómendigimen baılanysty ekeni sóz boldy. Sondaı-aq Nur-Sultan qalasynda eriktiler toby qala turǵyndaryna úgit-nasıhat materıaldaryn taratty. Olar bir kúnde kandıdat ustanymdary basylǵan 3500-den asa paraqshany úlestirdi.
* * *
Nur Otan partııasy usynǵan prezıdenttikke kandıdat Qasym-Jomart Toqaevtyń respýblıkalyq qoǵamdyq shtaby Shymkent qalasyna keldi. Qala aktıvimen, shahar turǵyndarymen ótken alǵashqy kezdesýde shtab músheleri Shymkent qalasynyń damý áleýetine toqtala kele, ári qaraı órkendeý baǵytyndaǵy Q.Toqaevtyń baǵdarlamasyndaǵy basymdyqtar jaıyn sóz etti.
«Táýelsizdik jyldarynda Shymkenttiń damý qarqyny joǵary boldy. Endi tek Qazaqstandaǵy ǵana emes, búkil Ortalyq Azııa men TMD aımaǵyndaǵy eń iri qalaǵa aınalady dep senemiz. Ol úshin kandıdatymyzdyń baǵdarlamasynda aıtylǵandaı bir orynda turmaı órleý qajet. Al órleý aýyldy jerlerdi taza aýyz sýmen qamtamasyz etý, joldardy jóndeý, úsh aýysymdy mektepterdi zamanaýı bilim oshaqtarymen aýystyrý, apatty jaǵdaıdaǵy mektepterdi jabý sııaqty naqty isterden bastalady», dedi shtab jetekshisi M.Áshimbaev.
Sondaı-aq kezdesýde Májilis depýtaty, Halyq Qaharmany B.Ertaev, telejúrgizýshi D.Nurjigit, belgili qalamger N.Orazalın, «Egemen Qazaqstan» RG» AQ prezıdenti D.Qydyráli, qoǵam qaıratkerleri Q.Sultanov pen Z.Turysbekov, «Dostyq» qaýymdastyǵynyń tóraǵasy I.Hakımjanov sóz alyp, kandıdattyń baǵdarlamasyndaǵy negizgi basymdyqtar men halyqtyń áleýmettik jaǵdaıyn jaqsartýǵa baǵyttalǵan naqty ustanymdarǵa nazar aýdardy.
Budan keıin nasıhatshylar toby «Kórme» ortalyǵynda Shymkent qalasynyń jastarymen kezdesti. Belsendi jastardan quralǵan «Team Qazaqstan» forýmyna 3 myńnan asa jas qatysty. Jınalǵan jastardyń aldynda sóz alyp, eldiń erteńine beıjaı qaramaı, saılaýǵa shaqyrǵandardyń qatarynda Q.Toqaevtyń jaqtastary Mádına Sádýaqasova, Aıqyn Tólepbergen, «Alashuly» tobynyń ánshileri, belgili blogerler Ashat Sadyrbaı, Erǵazy Ázimhanuly jáne tanymal aktrısa Quralaı Anarbekova, telejúrgizýshi Dáýlet Bıjanov sııaqty belsendi jastar boldy.
* * *
«Ult taǵdyry» ulttyq-patrıottyq qozǵalysy atynan prezıdenttikke kandıdat retinde tirkelgen Ámirjan Qosanovtyń senim bildirilgen adamdary Atyraý qalasyndaǵy «Aqjelken» shyǵarmashylyq ortalyǵynyń qyzmetkerlerimen kezdesti. Jıynda kandıdattyń oblystyq saılaýaldy shtabynyń jetekshisi Ǵalymjan О́tebaev sóz tizginin ustady. Nasıhatshylar toby saılaýaldy tuǵyrnamany keńinen tanystyryp, kandıdattyń túrli máselege kózqarasy jaıly baıandap berdi. Al qatysýshylar bolsa, ózderin tolǵandyrǵan suraqtaryn qoıyp, oǵan tushymdy jaýap aldy.
О́ńir-óńirde kandıdattyń basty ustanymdary egjeı-tegjeıli túsindirilip jatyr. Onyń baǵdarlamasyndaǵy «Jemqorlyqqa jol joq» atty taraýynda jemqorlyqpen ymyrasyz kúres halyqaralyq standarttar boıynsha júrgizilýi qajet ekeni, jemqorlardyń múlkin tárkilep, olarǵa raqymshylyq qoldanbaý, ómir boıy memlekettik qyzmetke jolatpaý kerek ekeni aıtylǵan.
Sonymen qatar elordada Á.Qosanovtyń respýblıkalyq saılaýaldy shtabynda saılaý kúni ýchaskelerde daýys berý prosesin qadaǵalaıtyn baıqaýshylar úshin semınar ótkizildi. Sharada Dos Kóshim baıqaýshylardyń quqyqtary men mindetteri, saılaý kezinde oryn alýy yqtımal túrli jaǵdaılardaǵy áreketteri jaıly túsindirdi. Qatysýshylar qyzyǵýshylyq tanytqan taqyryptaryn kóterip, barlyq ózekti suraqtar tóńireginde mazmundy pikir almasty.
Al «Amanat» azamattyq platformasy táýelsiz baıqaýshylar birlestiginiń belsendileri prezıdenttikten úmitker Á.Qosanovtyń Qaraǵandy oblystyq saılaýaldy shtabyna bardy. Qazaqstandaǵy kezekten tys prezıdenttik saılaýǵa baıqaý júrgizý jumysynda tájirıbe almasý maqsatynda uıym ókilderi shtabtyń jumysymen tanysty. Taraptar saılaýaldy kezeńde jemisti yntymaqtastyqty odan ári jalǵastyrýǵa kelisti.
* * *
«Uly dala qyrandary» respýblıkalyq qozǵalysynan prezıdenttikke kandıdat Sádibek Túgeldi qoldaýǵa arnalǵan úgit-nasıhat jumystarynyń aıasynda Jezqazǵanda konsert ótti. S.Qojamqulov atyndaǵy mýzykalyq drama teatrda ótken is-sharada mysty shaharǵa arnaıy atbasyn burǵan saılaýaldy qoǵamdyq shtab ókilderi jınalǵan qaýymǵa kandıdattyń baǵdarlamasyn jan-jaqty túsindirdi.
«Jeriniń asty kenge toly, ústi ónerli jandarmen erekshelenetin, qadasyn Qanysh Sátbaevtaı xalqymyzdyń birtýar ǵalymy qadaǵan Jezqazǵan qalasyna bıyl 65 jyl tolmaq. Aldymyzda el ómirindegi erekshe mańyzdy saıası oqıǵa tur. Osy dodaǵa túsip otyrǵan qoǵam qaıratkeri, jazýshy S.Túgeldiń saılaýaldy baǵdarlamasyndaǵy tórt tuǵyr – til, dil, jer, ar-namys bir-birinen ajyramas ulttyq qundylyqtar. Ony jas urpaqtyń boıyna sińirýdiń basty baǵyttary baǵdarlamada aıqyn kórsetilgen. Ádildikti tý etip, sybaılas jemqorlyqqa jol bermeý, jumyssyzdyqty joıyp, jastardyń áleýmettik jaǵdaıyn jaqsartý, demografııaǵa kóńil bólý kandıdattyń basa nazar aýdaratyn basym baǵyttary», dedi kandıdattyń senim bildirilgen adamy, jýrnalıst Bazargúl Úmbetova.
Qazaq radıosynyń ardageri, dıktor Kúlásh Moldaxmetova prezıdenttikten úmitkerdiń memlekettik tildiń mártebesin bıiktetýdegi erekshe eńbegi jaıly aıtyp, til qudireti jaıly Kákimbek Salyqovtyń óleńin oqyp berdi. Al kórermender arasynan sóz alǵan Jezqazǵan ındýstrııalyq-gýmanıtarlyq kolledjiniń oqytýshysy Aqgúlshe Ibraeva qoǵam qaıratkeri S.Túgeldiń baǵdarlamasyn júregine jaqyn qabyldaǵanyn tilge tıek etti. Konsertte T.Qalmaǵambetov atyndaǵy fılarmonııa ánshileri Ardaq Muqyshev, Záýresh Omarova, Láıla Bekbalaqova, Asxat Saǵyndyqov, Záýre Elbaeva, Perızat Nesipbaeva jáne Aızada Ábdixalyqova óner kórsetti.
QR saılaý ýchaskelerinen tys jerde daýys berý
1. Qazaqstannyń barlyq azamat daýys berý kúni saılaý ýchaskesine kelýge múmkindikteri bolmaǵan jaǵdaıda – saılaýshylar kelesi sebepter boıynsha ýchaskeden tys jerde daýys bere alady: densaýlyq jaǵdaıyna; otbasynyń syrqat múshesine kútim jasaý sebebine; shalǵaıdaǵy jáne qatynasý qıyn aýdandarda bolýyna baılanysty.
2. Saılaýshy turǵan jeri boıynsha daýys berý týraly jazbasha ótinishin bere alady. О́tinish berýdiń sońǵy merzimi – jergilikti ýaqyt boıynsha 9 maýsym, saǵat 12:00.
3. Ýchaskege ótinish kelip túsken jaǵdaıda, saılaý komıssııasynyń tóraǵasy saılaýshylar tizimine tıisti belgi qoıady.
4. Komıssııa músheleri baıqaýshylardy, senim bildirilgen adamdardy jáne BAQ ókilderin saılaý ýchaskesinen tys jerde daýys berý týraly habardar etedi. Komıssııa músheleriniń shyǵý kezinde baıqaýshylar men kandıdattardyń senim bildirilgen adamdary ilesip júrýge quqyly.
5. Úı-jaıdan tys jerde daýys berýge arnalǵan tasymaldanatyn jáshikke saılaý komıssııasynyń eki múshesi ilesip júredi, olar búlinýi múmkin ekendigi eskerile otyryp, bıýlletenderdiń qajetti mólsherimen qamtamasyz etilýge tıis.
6. Bıýlleten saılaýshyǵa jazbasha ótinishimen jeke basyn kýálandyratyn qujat negizinde beriledi.
7. Bıýlleten bergen komıssııa múshesi oǵan óz qolyn qoıady, sondaı-aq saılaýshynyń ótinishine qol qoıady. Saılaýshynyń daýys berý qupııasy mindetti túrde saqtalady.
8. Saılaýshylardyń bıýlletenderi bar tasymaldanatyn ýrna aýmaqtyq saılaý ýchaskesine qaıtarylady.
Daıyndaǵandar
Orynbek О́TEMURAT,
Nurshat TО́KEN,
«Egemen Qazaqstan»
