Áıeldiń basty baqyty
Beısenbi, 18 sáýir 2013 2:20
Men bes balany ómirge keltirip, tárbıelep-ósirýime baılanysty zeınet jasyna budan eki jyl buryn – 53 jasymda shyqqan bolatynmyn. Ár nársege de qanaǵat kerek. Maǵan taǵaıyndalǵan zeınetaqy mólsherin qanaǵat tuta alamyn. Aıtaıyn degenim, osyndaı jasta zeınetaqyǵa erte shyǵý quqyǵy jańa zań tarmaqtarynda burynǵysha saqtalyp qala beretini – bolashaqta kóbeıip, ósip-ónýimizge jaǵymdy áser etedi dep oılaımyn.
Beısenbi, 18 sáýir 2013 2:20
Men bes balany ómirge keltirip, tárbıelep-ósirýime baılanysty zeınet jasyna budan eki jyl buryn – 53 jasymda shyqqan bolatynmyn. Ár nársege de qanaǵat kerek. Maǵan taǵaıyndalǵan zeınetaqy mólsherin qanaǵat tuta alamyn. Aıtaıyn degenim, osyndaı jasta zeınetaqyǵa erte shyǵý quqyǵy jańa zań tarmaqtarynda burynǵysha saqtalyp qala beretini – bolashaqta kóbeıip, ósip-ónýimizge jaǵymdy áser etedi dep oılaımyn.
Biz – aýmaǵy úlken, halqynyń sany az memleketpiz. Sondyqtan kóbeımesek kósegemizdiń kógermeıtini de anyq. Elbasy Nursultan Nazarbaevtyń memleketimizdegi demografııalyq saıasatty tereńdetýge qatysty aıtqan «Qazaqstandaǵy halyq sanynyń ósimin ár otbasyndaǵy tórtinshi sábı quraı alady. Sondyqtan biz tórt balaly analardy qoldaýǵa baǵyt ustanýymyz kerek», degen sózi áli kúnge deıin qulaǵymda jańǵyryp turǵandaı. Sondyqtan bolashaqta tórt balaly otbasylardy memleket tarapynan qoldaý tetikteri oılastyrylady degen senimdemin.
Parlament Májilisi maquldaǵan jańa zańda áıelderdiń zeınet jasy ósirilgen. Munyń ózi qoǵamda keı jaǵdaıda ártúrli pikir týǵyzǵanymen, bul ózgeris kózdi ashyp-jumǵandaı bir sátte bola qalmaıtynyn sińlilerimiz ben qyz-kelinderimiz eskergeni jón. Iаǵnı, bul úrdis aldaǵy 2014 jyldan bastap eseptegende, tabany kúrekteı 10 jyl ýaqytqa laıyqtalǵan. Demek, zeınetke shyǵý jasyn satylap ósirý aıta qalarlyqtaı áleýmettik qıyndyq týǵyza qoımasy kámil.
Memlekettegi zeınetaqy júıesin odan ári jaqsartý jónindegi qadamdar, eń aldymen, zeınetaqy mólsherin ósirý men ulǵaıtý maqsatynan bastaý alyp otyrǵanyn kópshiligimiz tereń sezine bermeıtin sııaqtymyz. Osy aralyqta áıel adamdar jınaqtaýshy zeınetaqy júıesine qatysý ótilin uzarta alady eken. Sonymen bir mezgilde, zeınetaqy jınaqtarynyń kólemi de ósetini belgili bolyp otyr.
Kóp balaly ana retinde aıtarym, bes jáne odan da kóp bala taýyp, zeınet jasyna erterek shyǵý – áıeldiń basty baqyty. Meniń oıymsha, áıel zatynyń basty adamı muraty – urpaq ósirý, onyń qyzyǵyn kórý. Endeshe, 53 jasta zeınet demalysyna shyǵyp, nemere súıip, áje atanyp, olardyń mańdaılarynan ıiskep otyrǵanǵa ne jetsin! Men ómirdiń basty baqyty osy dep oılaımyn.
Asylǵanym LENOVA,
kóp balaly ana.
Batys Qazaqstan oblysy,
Kaztalov aýdany.
