Aımaqtar • 30 Mamyr, 2019

Qarqaralyda Qunanbaı qajy men bala Abaıǵa eskertkish qoıyldy

1849 ret kórsetildi

Qaraǵandy oblysyndaǵy Qarqaraly qalasynda «Rýhanı jańǵyrý» memlekettik baǵdarlamasy aıasynda Qunanbaı qajy men bala Abaıǵa eńseli eskertkish qoıyldy.


Tas tuǵyrdaǵy tarıhı tulǵalar qaladaǵy Qunanbaı qajy saldyrǵan meshittiń aldyna oryn tepti. Balasynyń ıyǵyna qolyn salyp kele jatqan Qunanbaı О́skenbaıuly músininiń bıiktigi 4,15 metr bolsa, qoltyǵyna kitabyn qysqan Abaı  beınesiniń boıy 2 metr 70 santımetrge jetedi. Eskertkish sary mystan quıylǵan.

Qazaqtyń qadirlilerine eskertkish qoıý ıdeıasyna aýdan ákimi Halel Maqsutov muryndyq bolǵan eken. Músinniń eskızi jergilikti sýretshi Sáken Dáýletbaevtyń qııalynan týypty. Al eskertkishtiń ózin Lenıngradtyń (Sankt-Peterbýrg) I.Repın atyndaǵy keskindeme, músin jáne sáýlet  ınstıtýtynyń túlegi, esimi máshhúr músinshi Talǵat Baıorazov kómekshilerimen birge jasap shyǵarǵan.

Eskertkishtiń ashylý rásiminde aýdan ákimi Halel Maqsutov jıylǵan qaýymdy aıtýly oqıǵamen quttyqtap, eskertkishti ornatýǵa qatysy bar azamattardyń barlyǵyna alǵys aıtty. Saltanatty sharaǵa Abaıdyń uly babasy Yrǵyzbaıdyń tikeleı urpaǵy Qosman Ǵımranuly arnaıy kelip qatysty.

Qaradan han shyqqan Qunanbaıdyń da, hákim Abaıdyń da ómirtarıhy Qarqaralynyń qasıetti topyraǵymen tyǵyz baılanysty. Uly aqynnyń ákesi qazaqtyń ótkenine qanyq osy qalada meshit saldyrsa, Abaıdyń óziniń de naǵashy Hám qaıyn jurty Qarqaraly jerine talaı márte at shaldyrǵany tarıhtan belgili. Qazirgi tańda qaladaǵy Qunanbaı qajy saldyrǵan aǵash meshit pen Abaı toqtaǵan úı tarıhı eskertkish retinde memlekettiń qorǵaýyna alynǵan.


Qaraǵandy oblysy


Sońǵy jańalyqtar

Bir kúnde 3907 adam koronavırýstan aıyqty

Koronavırýs • Búgin, 09:45

15169 adam koronavırýs juqtyrdy

Koronavırýs • Búgin, 09:17

Uqsas jańalyqtar