Is-sharaǵa Syrtqy ister mınıstrligi Investısııalar komıtetiniń tóraǵasy Baqyt Batyrshaev bastaǵan delegasııa qatysty. Onyń quramyna Shymkent qalasynyń ákimdigi, «Kazakh Invest» Ulttyq kompanııasy, «Astana» Halyqaralyq qarjy ortalyǵy (AHQO), «Jolaýshylar tasymaly» AQ men Qazaqstan fermerler odaǵynyń ókilderi kirgen bolatyn.
Shveısarııa tarapynan bank jáne qarjylyq qyzmet, konsaltıng, farmasevtıka, mashına jasaý, hımııa ónerkásibi, qurylys, AKT, kólik jáne logıstıka salasyndaǵy 40-tan astam kompanııa ókilderi qatysty.
Kezdesýge qatysýshylar Qazaqstannyń ártúrli salalardaǵy ınvestısııalyq múmkindikteri týraly, sheteldik ınvestısııalardy tartýda Qazaqstan Úkimetiniń jańa is-sharalary týraly habardar etildi. Qazaqstandyq taý-ken, hımııa, munaı-hımııa, azyq-túlik jáne basqa salalar, sondaı-aq onyń damyp kele jatqan tranzıttik áleýeti Shveısarııa kompanııalarynyń qyzyǵýshylyǵyn týdyrdy. Qarjy jáne bank qurylymdary AHQO-nyń qyzmetine erekshe qyzyǵýshylyq bildirdi.
Qazirgi tańda Qazaqstanda Glencore, Philipp Morris, ABB, Rieter, Schindler, Bühler, Leica, Nestlé, Roche, Novartis, Syngenta, Ammann Group sııaqty 40-qa jýyq shveısarııalyq kompanııa jumys isteıdi.
2005 jyldan 2018 jylǵa deıingi Shveısarııadan Qazaqstanǵa tartylǵan ınvestısııalardyń jalpy kólemi 23,2 mlrd AQSh dollaryn qurady. 2018 jyly tartylǵan tikeleı ınvestısııa kólemi 2,5 mlrd AQSh dollaryn qurap, 2018 jyly ekijaqty saýda kólemi 3 mlrd dollarǵa jetti.
Shveısarııa Qazaqstannyń EO, Reseı, Italııa, Qytaı, Nıderland jáne Fransııadan keıingi altynshy iri saýda áriptesi bolyp tabylady.
Dóńgelek ústel barysynda Qazaqstanda jumys isteıtin shveısarııalyq kompanııalar is-sharaǵa qatysýshylarǵa ózderiniń oń tájirıbesin kórsetti.
Qazaqstandyq delegasııa jumys sapary barysynda ınvestısııalyq yntymaqtastyqty talqylaý maqsatymen Swissport International Ltd., Burkhard Compression jáne Stadler Rail CIS (Shtadler TMD) kompanııalary ókilderimen kezdesýler ótkizdi.
