Aımaq basshysy Qumar Aqsaqalov pen Memlekettik qyzmet isteri jáne sybaılas jemqorlyqqa qarsy is-qımyl Agenttiginiń tóraǵasy Alık Shpekbaev oblys ortalyǵyndaǵy kóshi-qon qyzmeti ortalyǵynda boldy. Osydan eki jyl buryn ashylǵan nysanda 12 qyzmet túrleri elektrondyq kezek arqyly kórsetiledi. Qyzmet sapasyn “Digital agent” mobıldi qosymshasy arqyly baǵalaýǵa bolady. Ujymmen kezdesken vedomostvo jetekshisi ǵımaratty tıimdi paıdalanýǵa basa nazar aýdaryp, laýazymdy qyzmetkerler keń kabınette otyrýlary kerek degen kózqarastan arylý qajettigin atap kórsetti.
A. Shpekbaev №2 Petropavl qalalyq mamandandyrylǵan aýdanaralyq ekonomıkalyq soty men polısııa basqarmasynda ashylǵan front-ofısterdiń jumysymen tanysty.
«Ashyqtyq, halyq úshin qolaıly jaǵdaı jasaý jáne ákimshilik kedergilerdi azaıtý – bul qazirgi qoǵamnyń talaby», dedi kezdesýde kezinde Alık Jatqambaıuly.
№ 3 emhanada 76 dáriger men 246 orta medısına qyzmetkeri 70977 adamǵa qyzmet kórsetedi. Ýchaskelik dárigerge, zerthanaǵa qan tapsyrýǵa, dıagnostıka kabınetterine jazylý elektrondyq úlgide júrgiziledi. Ústimizdegi jyly “Qyzyljar – adaldyq alańy” jobalyq keńesiniń usynysymen qyzmet kórsetý sapasyn jaqsartyp, dárigerlerdiń jumysyn baǵalaý úshin Qr-kody engizilgen. Aldaǵy ýaqytta zerthanalyq aqparattyq júıeni engizý josparlanyp otyr. Elordalyq meıman M.Qozybaev atyndaǵy SQMÝ-diń materıaldyq-tehnıkalyq bazasymen jáne jastardyń boıynda adaldyqty qalyptastyrý boıynsha atqarylyp jatqan jumys barysymen de tanysty. Joǵary oqý ornynda “Sanaly urpaq” ofısi jáne stýdentterge qyzmet kórsetý ortalyǵy, “Adaldyq dúkeni” jumys isteıdi. Oqýshylar saraıyna barǵan agenttik tóraǵasyna hımııa-bıologııa baǵytyndaǵy Nazarbaev zııatkerlik mektebiniń ıgi sharalary usynyldy. “Qyzyljar – adaldyq alańy” jobalyq keńsesi de osy jerde ornalasqan. Joba jumysyna tartylǵan memlekettik qyzmetshiler, kásipkerler, buqaralyq aqparat quraldarynyń ókilderi alty salanyń jumysyn baqylaýǵa alǵan.
Agenttik tóraǵasy Shal aqyn aýdanynda «Ashyq ákimdik» jobasynyń ashylý rásimine qatysyp, sıfrlandyrý baǵdarlamasynyń júzege asý barysymen tanysty.
Soltústik Qazaqstan oblysy
