Mamandyqqa adaldyq

Senbi, 27 sáýir 2013 1:51

Hırýrg Meıram Turǵynovty birden tanyp shúıirkelesip ketý op-ońaı. Eki metrge jýyq eńgezerdeı tulǵasymen, ol árdaıym óziniń elgezek minezimen adamdarǵa aqyl-keńes berip, keıbireýine eskertý jasaýdan áste jalyqpaıdy. Operasııadan keıingi tártipti buzǵan pasıent te, temekini ústi-ústine qunyǵa shegip, óz densaýlyǵyna balta shaýyp júrgen kókórim jastar da hırýrg Meıram Turǵynovtan sóz estıtini ras. Basqasha bolýy da múmkin emes. Ol mundaı jat qylyqtarǵa tipti de tóze almaıdy. Esimi elge belgili Meıram Turǵynov degen hırýrg-onkolog azamat – mine osyndaı jan. Onyń otbasynda tórt dáriger bar, olardyń úsheýi – medısına ǵylymdarynyń doktory!

Senbi, 27 sáýir 2013 1:51

Hırýrg Meıram Turǵynovty birden tanyp shúıirkelesip ketý op-ońaı. Eki metrge jýyq eńgezerdeı tulǵasymen, ol árdaıym óziniń elgezek minezimen adamdarǵa aqyl-keńes berip, keıbireýine eskertý jasaýdan áste jalyqpaıdy. Operasııadan keıingi tártipti buzǵan pasıent te, temekini ústi-ústine qunyǵa shegip, óz densaýlyǵyna balta shaýyp júrgen kókórim jastar da hırýrg Meıram Turǵynovtan sóz estıtini ras. Basqasha bolýy da múmkin emes. Ol mundaı jat qylyqtarǵa tipti de tóze almaıdy. Esimi elge belgili Meıram Turǵynov degen hırýrg-onkolog azamat – mine osyndaı jan. Onyń otbasynda tórt dáriger bar, olardyń úsheýi – medısına ǵylymdarynyń doktory!

Ol ózin «soǵystyń balasymyn» dep ataıdy. Ákesi maıdanǵa attanǵanda Meıram bar bolǵany úsh jasta edi. Sóıtip kózi jáý­di­regen búldirshin anasymen jáne ápkesimen qala berdi. Surapyl soǵystyń tıgizgen zardabyn otbasymen birge basynan keshirip, bar aýyrtpalyqty kóterdi. Son­dyq­tan da qara nannyń qadirin, halyqtar dostyǵynyń baǵasyn jaqsy biledi.

– Meniń azamat jáne maman retinde qalyptasýyma Petr Pos­pelov pen Sáken Nyǵmanov úlken eńbek sińirdi. Mádenıet Sársem­baev, Ábdirahman Aýshev, Latıf Nanchıkeev, Telman Seı­sem­bekov, Sovet Asakaev, Tóńke­ris Tátikov, Ǵabdolla Qulqybaev tárizdi azamattarmen tabystyr­ǵan taǵdyryma dán rızamyn. Jar­ty ǵasyrdan asa ýaqyttan beri Qanı Musylmanbekovpen já­ne Qaıyr­jan Abısatovpen qoıan-qoltyq bir­ge eńbek etip kelemiz. Tek ju­mys barysynda ǵana emes, otbasymyzben jaqyn týysqandardaı aralasyp kettik. Maǵan ónegeli ul syılaǵan Noılııa jaryma rızamyn. Bizge qylyqtary baldaı tátti úsh nemere syılaǵan ulym men kelinime de aıtar alǵysymda shek joq! – dep aǵynan aqtaryl­dy hırýrg Meıram Turǵynov.

Dese de, Meıram Turǵynov ómirdiń buralań soqpaq jolynyń basynda medısınadan basqa sa­la­ǵa túsip kete jazdaǵan. Áýelde Meıram Baızrahmanulynyń geolog bolǵysy keldi. Kezdeısoqtyq degendi qoısańyzshy, birde ol Qaraǵandy memlekettik medısına ınstıtýtynyń rektory Petr Pospelovtyń uly Borıs dosymen birge mektep bitirer aldynda medısına jóninde pikir almasa qalǵany bar emes pe. Aqyry ekeýi kirispe leksııa tyńdaý úshin Qara­ǵandy memlekettik medısına ınstıtýtyna jol tartty. Bi­lim uıa­syn­daǵy maǵynaly áńgimeniń áse­­­rine eltigen bozbala Meıram medısına mamandyǵyna qulaı be­riledi. Qulaı berilgeni sonsha­lyq kúni búginge deıin dárigerden myq­ty mamandyq joq dep sanaıdy.

Ol 1961 jyly Qaraǵandy mem­lekettik medısına ınstıtýtyn úzdik támamdap, Máskeýdiń eksperımenttik jáne klınıkalyq onkologııa ınstıtýtynyń aspırantýrasyna joldama alady. As­pı­ran­týrany oıdaǵydaı aıaqtap shyǵyp, Almatydaǵy onkologııa jáne radıologııa ǵylymı-zertteý ınstıtýtyna jumysqa ornalasady. Keıinirek Qaraǵandy memle­ket­tik medısına ınstıtýtynyń gospıtaldy hırýrgııa kafedrasyna dosent bolyp qabylda­nady. Al 1974 jyldan beri osy joǵary oqý ordasynyń onkologııa kafedrasynda dosent qyzme­tin atqarady.

– Men ınstıtýt pen aspırantýradan bastap tamasha bilim mek­tebinen óttim. Tájirıbeli ustaz­dar­dan tálim aldym. Ol zaman­nyń bilim berý júıesi, tájirı­beden ótkizý mektebi óte joǵary edi ǵoı! Sonyń nátıjesinde bilikti maman, bilimdi dáriger bolyp shyqtyq, – dep eske alady ol búginde.

Onkolog mamandyǵy – júı­kesi juqa adamdardyń qoly emes. Qaterli isik shalmaıtyn adam aǵzasy joq. Olaı bolsa, adamnyń búkil aǵzasynyń normasy men patologııasyn bes saýsaqtaı bilý shart. Tek sonda ǵana densaýlyq saqtaý salasynyń myqty mamany bola alasyń.

О́mirdiń ózi alǵa tartqan osy aqıqatty ol búginde dárigerlik mamandyqtyń alǵysharty retin­de shákirtterine únemi qaıtalap, boılaryna sińirýdi daǵdyǵa aı­naldyrǵan. Búginde medısına salasy qaryshtap damýyna baılanysty qaterli isik dertin emdeý­diń de ońtaıly ádisteri tájirı­bege engizildi. Tek aýrýdy asqyn­dyryp almaý qajet. Hırýrg Meıram Turǵynov osy keseldiń jaı-japsaryn árkez ashyp aıtýdan jalyqpaıdy.

Meıram Baızrahmanuly stýdent kezinen-aq qoǵamdyq jumys­tar­dyń bel ortasynda júrdi. Qaraǵandy memlekettik medısına ınstıtýty komsomol komıte­tiniń hatshysy retinde talaı ret qalada uıymdastyrylǵan túrli sharalarǵa muryndyq boldy. Atqarǵan eńbegi eleýsiz qalmady. Alǵysqa kenelip aldyńǵy shepten kórindi. Mereıi ósip, jastar­ǵa ónege tanytty.

Búginde ol «Nur Otan» HDP múshesi jáne Qaraǵandy memle­kettik medısına ýnıversıteti ardagerler keńesiniń múshesi retin­de qoǵamdyq jumystardyń bel ortasynda júr. Buǵan qosa abdo­mınaldyq bólimshe men oblys­tyq onkologııalyq dıspanser emhanasynda kýratorlyǵy men oqy­týshylyq jumystary taǵy bar.

Qys aılarynda qoly qalt etken sátte Qarqaraly taýyna tartyp otyrýdan da sharshamaıdy. Shańǵy teýip rahatqa batady. Al jaz aılarynda kól jaǵasyna baryp, balyq aýlap qaıtýǵa da ýaqyt tabady. Sóıtken Meıram aqsaqaldyń 75 jasqa kelip otyr­ǵanyn eskersek, biraz nársege qanyǵamyz. Osy jastaǵy onyń qurdastary keıde mundaı ispen aınalysýǵa murshalary da bolmaıtyndyǵy ras.

Meıram Baızrahmanuly qa­shan­da shıraq. Bir sózben aıtqan­da, qartaıýǵa qoly tımeı júrgen tynymsyz jan. Al buǵan basty sebep, qoly jeńil otashynyń – súıikti mamandyǵyna degen adal­dyǵy.

Oksana MIаGKIH.

QARAǴANDY.