«Tańerteńnen bastap elordamyzda aýyzsha esepteý baǵdarlamasy boıynsha Eýrazııalyq Zııatkerlik Olımpıadasy ótkizildi. 9 elden jınalǵan 939 bala alty mınýtta árqaısysy on qıyn matematıkalyq matrısany oısha eseptep, álemdik rekord ornatty. Odan keıin, Qazaq eli alańynda segiz myńnan asa kolledj ben mektep oqýshylary mýzykalyq orkestrler men ansamblderdiń aýqymdy sherýine qatysty», dedi elorda ákimi Baqyt Sultanov.
Onyń aıtýynsha, respýblıkalyq «Juldyzaı» festıvali myńdaǵan balanyń kóńilin kóterip, ata-analardyń júregin eljiretti.
«Nur-Sultan Ethno Fest» iri etnomádenı merekesin tamashalaýǵa kelgen turǵyndar men qala qonaqtarynyń sany odan da kóp. Olar úshin atta otyryp sadaq atýdan 15 elden kelgen sadaqshylardyń qatysýymen l «Altyn jebe» álem chempıonaty ótedi. Atalǵan tórt sharada eń aldymen, múmkindigi shekteýli balalardy belsendi qatystyrýǵa tyrystyq. Olar basqalarmen teńdeı ónerlerin kórsetip, barshamyzdy tánti etti. Inklıýzııa bizdiń basty baǵytymyz bolýy tıis. О́ıtkeni ashyq aspan, Otanymyz, elordamyz bárimizge ortaq. Sondyqtan jasalyp otyrǵan jaǵdaı da barlyǵymyzǵa birdeı bolýy qajet», dedi qala ákimi.
Túrkistan oblysy uıymdastyrǵan jármeńkege 15 myńnan astam adam keldi. Bazardaǵydan 15% arzan ári paıdaly kókónis, jemis-jıdekter jazdyń alǵashqy kúninde turǵyndarymyzǵa jaqsy syılyq boldy. Qaladaǵy barlyq saıabaqtar men qoǵamdyq oryndarda balalardyń qatysýymen túrli festıvalder men shyǵarmashylyq konsertter ótýde. Búldirshinder úshin ótip jatqan is-sharalar men qoǵamdyq kólikte júrý tegin.
«Odan basqa, meni erekshe tań qyldyrǵan Comic Con festıvali boldy. Onyń jastar arasyndaǵy tanymaldyǵyn osy ýaqytqa deıin bilmeppin. Ákimdik pen EKSPO Ulttyq kompanııasy qoldaǵan sharany kórýge bir jarym kúnde 25 myń adam (mektepke barmaıtyn búldirshinderdi sanamaǵanda) keldi. Al, biz 3 kúnde barlyǵy 25-28 myń azamat keledi dep josparlaǵan edik. Dál osyndaı qyzyǵýshylyq bolsa, Nur-Sultanda osyndaı festıvaldi dástúrli túrde ótkizý qajet dep oılaımyn», dedi B.Sultanov.
