Bul oqıǵa boıynsha astanalyq polıseıler Qylmystyq kodekstiń 141-babynda kórsetilgen «Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý» boıynsha is qozǵap, tergeýdi bastaǵan. Osy jazataıym oqıǵaǵa oraı jýrnalıster aldyna shyǵyp, túsinik bergen Nur-Sultan qalalyq bilim basqarmasy basshysynyń orynbasary Dýlat Jekebaev istiń aq-qarasy osy tergeý jumystarynan keıin aıtylady degenimen, óziniń qolyndaǵy birqatar málimetimen bólisti.
– Qaza bolǵan qyz bala №10 mekteptiń oqýshysy. Jazǵy lagerge ata-anasynyń ótinishimen jazylǵan. Ata-analar balalaryn «Han Shatyrdaǵy» basseınge aparýdy ótingen. Basseınge balalardy mektep muǵalimderimen birge birneshe ata-ana da aparǵan. Jalpy, basseınge 200-deı bala barǵan, – dedi D.Jekebaev.
Basqarma ókiliniń aıtýyna qaraǵanda, «Han Shatyrǵa» mektep janyndaǵy jazǵy lagerlerde demalyp jatqan balalar jyl saıyn toptastyrylyp aparylady eken.
– «Han Shatyrdaǵy» nusqaýshylar tarapynan balanyń qaýipsizdigine baılanysty barlyq shara durys oryndalǵan, – dedi D.Jekebaev.
Qoldaǵy derekterge qaraǵanda, qaza tapqan jetkinshek otbasyndaǵy tórt balanyń úlkeni bolǵan.
Basseınge kelgen balalar tobyna tárbıeshiler, tálimgerler men ata-analardan quralǵan 24 eresek adam basshylyq etken.
