Murat Qastaev bizge bergen suhbatynda «Saılaý qarsańynda valıýta naryǵynda dúrligýdiń bar ekeni baıqalady, devalvasııa bolýy múmkin, sózsiz devalvasııa bolady degen aqparattar halyqtyń arasynda shıelenistiń týýyna ákelýde. Bizdiń oıymyzsha, devalvasııanyń bolýyna esh sebep joq. Naryqtyń qandaı da bir oıynshylary osy taqyrypty qozdyryp, osynyń arqasynda paıda kórgisi keletin sııaqty. Ulttyq banktiń saıası erki men belsendi ustanymy naryqty tynyshtandyryp, ony tepe-teńdik jaǵdaıyna ákelýge tıis», – dep jaýap berdi.
Osyǵan deıin Ulttyq bank tóraǵasy Erbolat Dosaev jýrnalısterge devalvasııa bola ma, joq pa degen máseleni talqylaýǵa qulqy joq ekenin aıtqan edi.
Alaıda 3 maýsym kúni ol «Bıylǵy jyldyń mamyr aıyndaǵy munaı baǵasy sııaqty faktorǵa mán beretin bolsaq, ulttyq valıýtanyń álsireýi 0,4% (381,08 teńgeden 382,56 teńgege deıin) boldy. 27 mamyrdan bastap 3 maýsymǵa deıingi aralyqta 1,2%-ǵa (bir dollar 379,86 teńgeden 383,94 teńgege deıin) álsiregen», – dep túsindirdi Erbolat Dosaev.
Ulttyq bank valıýta naryǵynda valıýtalyq ıntervensııa jasaǵan-jasamaǵanyn aıtpaı otyr. AQSh dollary men qazaq teńgesi baǵamy týraly aqparattarda resmı bıliktiń ustanymy emes, el aýzyndaǵy jel sóz jeńip jatyr. Tipti keshe elde tıyndardy aınalymnan shyǵaryp tastady degen habar jetti.
Ulttyq bank te, Qazaqstan qarjygerler qaýymdastyǵy atynan sóz alǵan qarjylyq qaýymdastyq ta bul aqparatty arandatýshylyq dep tanydy. Sebebi EAEO týraly kelisimshartta biryńǵaı valıýtalyq odaqty qurý jáne biryńǵaı valıýtany engizý qarastyrylmaǵan. Onyń aldaǵy 5 jylda qaıta kóterilýi múmkin de emes. Olardyń paıymdaýynsha, qarjylyq retteýshiniń biryńǵaı ortalyq bankin quryp, oǵan biryńǵaı valıýtany engizýdi ulttyq organdardan joǵary turatyn organǵa bermeıinshe, bul múmkin emes sharýa.
Keshe tústen keıin KASE-de Qazaqstan Prezıdentiniń kezekten tys saılaýy aldyndaǵy sońǵy kúndizgi saýda boldy. 9 maýsym kúni qazaqstandyqtar memlekettiń jańa basshysyn tańdaýǵa barady, odan keıin halyqtyń maýsymda sheteldik valıýtany qanshalyqty satyp alǵanyn jáne onyń qanshalyqty paıdaly bolǵanyn biletin bolamyz.
10 maýsym kúni qazaq teńgesiniń naryqtyq
baǵasy belgili bolady.
