Qazaqstan Respýblıkasynyń eńbek sińirgen ártisi, ánshi-termeshi Qalampyr Rahımovanyń 70 jyldyǵyna arnalǵan respýblıkalyq baıqaý 18 ben 45 jas aralyǵyndaǵy, Qazaqstannyń óner salasyndaǵy resmı ataǵy joq, buryn termeshiler baıqaýynda bas júlde almaǵan jyrshy-termeshi qyz-kelinshekterge arnalǵan bolatyn. О́ner saıysyn Qazaqstan Respýblıkasynyń eńbek sińirgen artısi, Ǵarıfolla Qurmanǵalıev atyndaǵy Batys Qazaqstan oblystyq fılarmonııasynyń ánshisi Sáýle Taýdaeva jetekshilik etken qazylar alqasy qadaǵalady.
Shara barysynda baıqaýǵa qatysýshylar men meımandar Shyńǵyrlaý aýylynyń ortalyq saıabaǵynda ornalasqan Qalampyr Rahımova eskertkishine gúl shoǵyn qoıyp, aýdandyq ólketaný mýzeıinde óńir tarıhymen tanysty.
Eki kezeńnen ótken án saıysynda ánshiler Qalampyr Rahımovanyń úntaspada jazylǵan ánderin, termelerin urpaqtan-urpaqqa nasıhattap, jyrshylyq-termeshilik ónerdi keıingi urpaqqa qalybyn buzbaı jetkizip kele jatqanyn kórsetti. Baıqaýdyń bir maqsaty – ánshiniń esimin máńgi este saqtaý bolsa, ol údeden jetti deýge bolady.
Quramynda Shyńǵyrlaý aýdany ákiminiń orynbasary Erjan Turmaǵambetov, Batys Qazaqstan oblystyq halyq shyǵarmashylyǵy ortalyǵynyń dırektory Máýlet Jubatov, Qazaqstan Respýblıkasy Halyq aǵartý isiniń úzdigi, dástúrli ánshi Baıan Qabıeva jáne respýblıkalyq ánshiler baıqaýlarynyń júldegeri, Ǵarıfolla Qurmanǵalıev atyndaǵy fılarmonııa ánshisi Ernar О́miráli bar qazylar alqasynyń sheshimimen baıqaýdyń bas júldesi – 500 myń teńge oraldyq ánshi Nazgúl Qabıevaǵa tıdi.
Árqaısysy 150 myń teńgelik I oryn júldesine qyzylordalyq Nuraıym Ertalapqyzy men Batys Qazaqstan oblysynyń Terekti aýdanynan kelgen Laýra Muhambetjanova laıyq dep tanyldy.
Oraldyq Ámına Ǵaınedenova men aqtóbelik Ǵazıza Ábdirova II oryn alǵany úshin 125 myń teńgeniń sertıfıkatyna ıe boldy.
Aqtaý qalasynan kelgen Aınur Omarova, qostanaılyq Aıjan Sanaı, oraldyq Aqmaral Kemelhanova árqaısysy 65 myń teńgelik III oryn syılyǵyn ıelendi.
Baıqaýǵa qatysqan ózge ánshiler de qur qol qalmady. Aqtóbe qalasynan kelgen ánshi Juldyz Orynbekovaǵa, oraldyq Ádemi Ádilgereevaǵa, BQO-nyń Syrym aýdany atynan qatysqan Gúlnafıs Ihlasovaǵa jáne shyńǵyrlaýlyq Indıra Nyǵmetovaǵa yntalandyrý syılyǵy – 50 myń teńgelik sertıfıkat tabys etildi.
Batys Qazaqstan
