Memlekettik Tý men Prezıdent Baıraǵy, sondaı-aq, Qazaqstan Respýblıkasynyń Konstıtýsııasy Táýelsizdik saraıynyń Úlken zalyna ákelingen soń, jańadan saılanǵan Qazaqstan Respýblıkasynyń Prezıdenti Memlekettik kúzet qyzmeti bastyǵynyń raportyn qabyldap, ishke kirdi.
Konstıtýsııanyń 42-babyna sáıkes, Qasym-Jomart Toqaev halyqqa ant berdi.
– Qazaqstan halqyna adal qyzmet etýge, Qazaqstan Respýblıkasynyń Konstıtýsııasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblıkasy Prezıdentiniń ózime júktelgen mártebeli mindetin adal atqarýǵa saltanatty túrde ant etemin.
Jańa saılanǵan Qazaqstan Prezıdentiniń qyzmetke kirisý qurmetine Memlekettik ánuran oınalyp, zeńbirekterden 21 ret oq atyldy, Aqorda rezıdensııasynyń ústinde Qazaqstan Respýblıkasynyń Memlekettik Týy kóterildi.
Ortalyq saılaý komıssııasynyń tóraǵasy Berik Imashev Qasym-Jomart Toqaevqa Qazaqstan Respýblıkasy Prezıdentiniń kýáligin tapsyrdy.
Memleket basshysy ulyqtaý rásiminde sóılegen sózinde zor senim artqany úshin qazaqstandyqtardyń bárine alǵys aıtyp, qazirgi qazaq memlekettiliginiń negizin qalaýshy Qazaqstannyń Tuńǵysh Prezıdenti – Elbasy Nursultan Nazarbaevtyń erekshe rólin atap ótti.
– Meniń maqsatym – qoǵamnyń birligin qamtamasyz etý jáne árbir azamattyń quqyǵyn qorǵaý. Qazaqstannyń ulttyq múddesin árqashan jáne barlyq jerde qorǵaıtyn bolamyn, – dedi Qasym-Jomart Toqaev.
Qazaqstan Prezıdenti on negizgi baǵytty belgilep berdi jáne olardyń bárin júzege asyrýǵa dereý kirisý kerektigin aıtty. Atap aıtqanda, halyqtyń tabysyn arttyrý jáne ál-aýqatyn jaqsartý, sybaılas-jemqorlyqqa qarsy tıimdi is-qımyldar jasaý, sottyq-quqyqtyq reforma, ádiletti áleýmettik saıasat, turǵyn úı máselesin sheshý, óńirlerdi damytý, tepe-teńdik jáne kópvektorly syrtqy saıasat, sondaı-aq, jastardy qoldaý.
Sońynda Qazaqstan Respýblıkasynyń Prezıdenti – QR Qarýly Kúshteriniń joǵarǵy Bas qolbasshysy Táýelsizdik saraıynyń aldyndaǵy alańda Qorǵanys mınıstri Nurlan Ermekbaevtan raport qabyldady. Memleket basshysynyń aldynan QR Qarýly Kúshteriniń ásker túrleri saltanatty sap túzep ótti.
Ulyqtaý rásimine Tuńǵysh Prezıdent – Elbasy Nursultan Nazarbaev, Qazaqstan Respýblıkasynyń Parlamenti depýtattary, Úkimet músheleri, Joǵarǵy sot sýdıalary, Konstıtýsııalyq Keńestiń músheleri, Prezıdent Ákimshiligi men Premer-Mınıstr Keńsesiniń ókilderi, ortalyq memlekettik basqarý organdarynyń basshylary, Ortalyq saılaý komıssııasy men Qazaqstan Halqy Assambleıasynyń músheleri, dinı konfessııa ókilderi, oblystar men Nur-Sultan, Almaty jáne Shymkent qalalarynyń ákimderi, Qazaqstandaǵy dıplomatııalyq ókildikterdiń basshylary, prezıdenttikke úmitker bolǵandar, «Nur Otan» partııasynyń basshylyǵy, Respýblıkalyq jáne aımaqtyq qoǵamdyq shtabtardyń músheleri, qoǵamdyq uıymdardyń jáne buqaralyq aqparat quraldarynyń ókilderi, isker toptar ókilderi, kórnekti ǵalymdar, mádenıet jáne óner qaıratkerleri, jastar uıymdarynyń kóshbasshylary qatysty. Rásimge barlyǵy 2500 adam qatysty.
