Zertteý barysynda belgili bolǵandaı Abaıdyń bı bolyp saılanǵandyǵyna oraı 1885 jylǵy qundy qujat tabylypty. N.I. Lobachevsıı atyndaǵy Qazan memlekettik ýnıversıtetiniń kitaphanasynda Abaıdyń qoǵamdaǵy aralasqan qyzmetteri jaıly qujat qolǵa ilikken. 1885 jyly Qaramola jerindegi sezde qabyldanǵan arab tilindegi «Qarapaıym qazaqtarǵa arnalǵan Kodeks» Birinshi quqyqtyq qujattyń túpnusqasy osy eken.
- Qaramolada barlyǵy Abaıdy sezd tóraǵasy etip saılaıdy, - dedi Abaı mýzeıi dırektorynyń orynbasary Meıramgúl Qaırambaeva, – Abaı úsh kún ishinde zańǵa baılanysty maqalalar jazady. Qujat 1885 jyly mamyrda qabyldanyp, bir jyl ótken soń Qazan qalasyndaǵy Imperator ýnıversıtetiniń baspahanasynda shyǵaryldy.
Mamandardyń aıtýynsha, Abaı demokrat retinde qarapaıym qazaqtardyń ómirin qalaı jeńildetemiz degen baǵytta kóptegen usynystar kirgizgen. Buǵan deıin mýzeıde kırıllısa úlgisindegi mashınkaǵa basylǵan kóshirmesi ǵana bar eken. Bul 1959 jylǵy kóshirme. Sondyqtan da tabylǵan túpnusqa dal zańdaryn zertteýge tolyq múmkindik beredi.
Raýshan NUǴMANBEKOVA
«Egemen Qazaqstan»
SEMEI
