Keńes otyrysyna qatysqan Syrtqy ister mınıstri Beıbit Atamqulov Prezıdent Qasym-Jomart Toqaevtyń ulyqtaý rásiminde sóılegen sózinde memlekettik saıasatty iske asyrýdaǵy qoǵamnyń rólin arttyrýdyń mańyzyn erekshe atap ótkenine basa nazar aýdardy.
«Memleket azamattyq qoǵamdy damytýǵa zor kóńil bóletin bolady. Sondyqtan biz úshin Keńes músheleriniń asa ózekti máselelerdi talqylaýǵa belsendi atsalysyp, Syrtqy ister mınıstrligi qabyldaıtyn sheshimderge saraptamalyq baǵa berýi óte mańyzdy», dedi mınıstr.
Otyrys kún tártibine sáıkes Syrtqy ister mınıstriniń orynbasary Ermek Kósherbaev sheteldik ınvestısııalar tartý jáne qazaqstandyq taýarlardyń eksportyn ilgeriletý salalaryndaǵy mınıstrlik qyzmetiniń jańa basymdyqtary jóninde baıandama jasady.
Baıandamada 2018 jyly tartylǵan ınvestısııalar boıynsha kórsetkishter týraly tolyq aqparat usynyldy. Atap aıtqanda, tikeleı sheteldik ınvestısııalardyń jalpy aǵyny 15,8%-ǵa ósip, 24,3 mlrd AQSh dollaryn qurady. 2019 jylǵy qańtar-sáýir aılary aralyǵynda negizgi kapıtalǵa baǵyttalǵan ınvestısııa kólemi 6,7%-ǵa ósip, 2,9 trln teńgege jetti. Olardyń ishinde syrtqy ınvestısııalar negizgi kapıtalǵa quıylǵan ınvestısııalar jalpy kóleminiń 36%-yn (1,05 trln teńge) quraıdy.
Qazaqstannyń ınvestısııalyq ahýalyn jaqsartý boıynsha atqarylyp jatqan jumys jóninde aıta kele, E.Kósherbaev syrtqy saıası vedomstvonyń ınvestorlardyń aqparattyq-konsýltasııalyq kómekke ǵana emes, sondaı-aq memlekettik qyzmetterge qol jetkizýin qamtamasyz etetin jáne jobalardy bastapqy kezeńnen tolyq iske asyrýǵa deıin súıemeldeýdiń biryńǵaı alańy bolatyn front-keńseler qurý boıynsha jumys júrgizip jatqanyn atap ótti.
Mınıstrdiń orynbasary Qazaqstannyń shetelderdegi mekemeleri ınvestısııalar tartý júıesin jetildirý jónindegi damyǵan elderdiń úzdik tájirıbelerin jáne EYDU usynymdaryn eskere otyryp, jańa tásilderdi anyqtaý baǵytynda shetelde birqatar is-sharalar júrgizip jatqanyn da tilge tıek etti.
Syrtqy ister mınıstrliginiń syrtqy eksportty jyljytýdaǵy róline qatysty E.Kósherbaev vedomstvo janynda qurylǵan praktıkalyq sharalardy ázirleýge jáne jedel túrde aqparat almasýǵa baǵyttalǵan shıkizattyq emes eksportty jyljytý máseleleri boıynsha arnaıy vedomstvoaralyq jumys toby qyzmet etetinin aıtty.
Azamattyq qoǵam tarapynan sheteldik ınvestısııalardy tartý týraly «Qazaqstannyń ınternet assosıasııasy» ZTU prezıdenti Shavkat Sabırov baıandama jasady. Sarapshy óz baıandamasynda Qazaqstandaǵy eksporttyq resimdeýge nazar aýdaryp, olardy jeńildetýge qatysty birqatar usynys jasady.
Budan ári Syrtqy ister mınıstriniń orynbasary Roman Vasılenkonyń «Qazaqstan Respýblıkasy syrtqy saıasatynyń jańa tujyrymdamasy» atty taqyryptaǵy baıandamasy tyńdaldy. Ol otyrysqa qatysýshylarǵa qujattyń jańa redaksııasy boıynsha júrgizilgen jumys jóninde aıtyp berdi.
Mınıstrdiń orynbasary Qazaqstannyń aldaǵy ýaqytta da álemniń barlyq memleketterimen teń áriptestik qarym-qatynastardy damytýǵa baǵyttalǵan syrtqy saıası baǵyt júrgizetinin atap ótti. Bul tezıs Qazaqstan Prezıdenti Q.Toqaevtyń Qazaqstannyń Tuńǵysh Prezıdenti – Elbasy Nursultan Nazarbaev bastap bergen konstrýktıvti, teńdestirilgen, kópvektorly syrtqy saıası baǵytty jalǵastyrady dep aıtqan pozısııasymen tolyq úılesedi.
«Tujyrymdamanyń mazmunynda Elbasy men Memleket basshysynyń syrtqy saıasattyń ekonomıkalyq baǵytyn kúsheıtý jónindegi tapsyrmalary eskerilgen. Onda sıfrly transformasııa, «jasyl tehnologııalardy» damytý, «jumsaq kúshti» keńinen qoldaný sııaqty jahandyq trendter kórinis tapty. Qujatqa halyqaralyq qatynastardyń bitimgershilik jáne medıatorlyq sııaqty jańa nysandar engizilgen», dedi R.Vasılenko.
Mınıstr orynbasarynyń aıtýynsha, múddeli organdarmen kelisilgennen keıin mátin kópshiliktiń talqylaýyna salý maqsatynda SIM veb-saıtyna ornalastyrylǵan.
Pikirtalas barysynda Keńes músheleri ınvestısııalyq ahýaldy jaqsartý, sheteldik kapıtaldy tartýdaǵy mınıstrlik jumysyn jandandyrý jóninde birqatar usynys aıtyp, syrtqy saıasattyń jańa tujyrymdamasynyń jobasyna qatysty konstrýktıvti talqylaý júrgizdi.
Qoǵamdyq keńestiń kezekti otyrysy 2019 jyldyń kúzine josparlanǵan.
