«Baladan asqan baqyt joq» – deıdi balalar dárigeri Álııa Gaınýtdınova

– Qyzym, – degen ol,– eń abzaly dáriger bolý. Qanshama adamǵa qýanysh syılaısyń. Al balalar dárigeri bolsań, tipti jaqsy. Bala­dan asqan baqyt joq qoı.

Ana sózi amanat ispetti. 1986 jyly Kazgorodok orta mektebin bitirgennen keıin Selınograd memlekettik medısına ınstıtýtynda bilim aldy. Oblystyq balalar aýrýhanasynda taban aýdarmastan 18 jyl qyzmet etkennen keıin eńbek joly qalalyq emhanada jalǵasty. Osy jyldar ishinde mol tájirıbe jınaqtady, bi­limin baıytty.

Sol tájirıbesine súıengen balalar dárigeri Álııa Gaınýt­dınovanyń aıtýyna qaraǵanda, balalar boıyndaǵy dert jyl maýsymyna baılanysty birde azaıyp, birde kóbeıip turady eken. Máselen, tynys alý organdary, ókpeniń qabynýy qaqaǵan qys aılarynda jıi kezdesedi. Kóktemniń de óz ereksheligi bar. Keı jyldary belgilengen tártip bo­ıynsha jylý berý maýsy­my aıaq­tal­ǵanymen, jadyra­ǵan jaz­dyń shýaǵyn tógýi kesheýil­deıdi. Bul endi soltústik óńir­ge tán jaıt. Qala páterleri qo­ńyr­jaı salqyn bolǵan soń balalar aýrýǵa jıi shal­dyǵady. Endigi bir másele osy juqpaly dert boı kóte­rip, aýrý beleń alǵan tusta, ony­men kúresýdegi qıyndyq. Mamannyń aıtýyna qaraǵanda, balalar dárigeri jetispeıdi. Ár­qaı­sy­synyń júktemesi eki-úsh eseden keledi. Kadr tapshylyǵyna negiz­gi sebep, jalaqynyń jary­tym­syz­dyǵy, baspananyń joq­ty­ǵy, áleý­mettik-turmystyq jaǵ­daı­dyń nasharlyǵy.

Qazir balalar arasynda eń jıi kezdesetin aýrý túri – tynys organdary eken. Kúni-túni kók tú­tinnen arylmaıtyn qalanyń aýasy da kesirin tıgizip jatqany anyq. Bir-birine sabaqtasyp jat­qan qıyndyq ataýlyny keshendi túr­de sheshe alsaq, keler urpaq dert­­ten ada, táni saý bolyp qalyp­tasa­dy.

– Balǵyndar – el bolashaǵy, bola­shaǵymyz myqty bolýy úshin de osy bastan uzaq jyl boıy qordalanyp qal­ǵan máselelerdi kóp bolyp bir­lesip sheshý kerek,–deıdi Álııa Gaınýtdınova,–qazir mem­leket tarapynan jaqsy qam­qor­lyq jasalyp otyr. Biz­diń em­hananyń janynda kúndizgi stasıonar bar. Emdelýi, dári-dármegi tegin. Aı saıyn ondaǵan bala em­­delip, qulan-taza jazylyp shy­­ǵady. Ras, kadr jetpegen soń ýaqytpen sanaspaı  jumys is­­teýge týra keledi. Biz oǵan esh renjimeımiz. О́ıtkeni baladan asqan baqyt joq qoı.

Aqmola oblysy