Meıirbıke degen sózdiń tórkini – meıirim. Syrqat jandy saýyqtyrýǵa bar kúsh-jigerin arnaıtyn abzal jan ǵana bul mamandyqtyń naǵyz ıesi atana alady. Atyraý oblysyndaǵy Qulsary qalasynda osyndaı meıirbıke turady. Ony Jylyoı aýdanynyń halqy «Meıirger Sharhat» dep erekshe qurmetpen ataıdy. Aýdandyq aýrýhanada 28 jyldan beri eńbek etip kele jatqan Sharhat Sádýaqasova úshin aldyna kelgen naýqastyń qulan-taza aıyǵyp ketkeninen artyq baqyt joq. Jazdyń aptap ystyǵynda, qystyń qaqaǵan aıazynda, kúzgi nóser jaýynda da, táýliktiń qaı ýaqyty bolsyn ol kómek kútip otyrǵan adamnyń úıine jetkenshe asyǵady. Dárisin berip, ekpesin salyp, qyzýyn ólshep, jaǵdaıy jaqsarǵansha qasynda otyrý qashannan ádetine aınalǵan. Qala turǵyny Zeınolla Boztaev: «Densaýlyǵym syr bere qalsa, meıirger Sharhatty izdeımin, deıdi. – Kez kelgen ýaqytta qasymyzdan tabylady, bizdiń ýchaskede osyndaı medısına mamanynyń bolǵanyna qýanamyz». Mundaı mysaldar kóp. О́zine bólingen ýchaskeniń jasymen de, kárisimen de til tabysyp, elge etene jaqyn bolǵany úshin de jerlesteri ony jaqsy kóredi.
Naýqas adamǵa keıde dárigerdiń dárisinen buryn ashyq-jarqyn qabaǵy áser etedi. Sharhat Maılanqyzy emdik sharalar júrgizbes buryn ár syrqattyń janyna úńilip, kúsh-jiger berýdi ádetine aınaldyrǵan. «Meıirger bolǵysy keletin jastardyń aldymen adamgershilik qasıetteri joǵary bolýy tıis, – deıdi ol. – Adam taǵdyryna nemquraıly qaramaý, kúızeliske tózimdi bolý da mańyzdy. Meniń ýchaskemde 1700 adam bar, olardyń bárin týystarymdaı kóremin».
Sharhat Maılanqyzy 1965 jyly Jylyoı aýdany Qaraton aýylynda kóp balaly otbasynda dúnıege kelgen. Orta mektepti támamdaǵannan keıin sol kezdegi Gýrev medısına kolledjine oqýǵa túsedi. Bala kúnnen armandaǵan meıirbıke mamandyǵyn meńgerip, eńbek jolyn Mańǵystaý oblysy Munaıly aýdanyndaǵy jedel járdem bólimshesinen bastady. 1986 jyly týǵan jerine oralyp, Teńiz qalashyǵynda jumysyn jalǵastyrǵan. 1991 jyly turmys quryp, Jylyoı aýdandyq ortalyq aýrýhanasyna meıirger bolyp ornalasty. Sodan beri osy jumysyn abyroımen atqaryp keledi.
Qyzmetinde áriptesterine syıly, aýyldastaryna bedeldi Sharhat Sádýaqasova bir áýlettiń ónegeli kelini, asyl jar, abzal ana. О́mirge úsh bala ákelip, zaıybymen birge baqytty ǵumyr keshýde.
Qarapaıym adamı baqyt degen de osy emes pe?
ATYRAÝ
