Prezıdent • 17 Maýsym, 2019

Elimizde «Prezıdenttiń kadrlyq rezervi» jasaqtalady

650 ret kórsetildi

Qasym-Jomart Toqaev prezıdenttik qyzmetine kiriser aldyndaǵy ulyqtaý saltanatynda Qazaqstandy damytýda jastardyń qozǵaýshy sheshýshi kúshke ıe ekenin aıtyp, aldaǵy ýaqytta «Prezıdenttiń kadrlyq rezervi» túziletinin atap ótti. Bul saılaýaldy tuǵyrnamada aıtylǵandaı, sabaqtastyqpen birge saıası basqarý quramynda ózgeristiń de bolatynyn baıqatady. Iаǵnı elimizdiń joǵary saıası ısteblıshmenti jańarady.

Bul týraly Prezıdenttiń bir aı buryn elimizdiń batys óńirine ja­sa­ǵan jumys saparynda aıtylǵan edi. Memleket basshysy týıt­ter­de­gi paraqshasynda da ekonomıkada, ǵylymda, mádenıet pen sport sala­syn­daǵy talantty jastardy qol­daý­­ǵa jaǵdaı jasalatynyn jazdy. «Biz­diń negizgi basymdyq – jastarǵa arnalǵan áleýmettik lıftiniń tıim­di­li­gi men ashyqtyǵyn qamtamasyz etý. Osy maqsatta «Prezıdenttiń kadrlyq re­zer­vi» qurylady» degen sózi jastardyń kókeıindegi oıdy tap basty.

Elbasy 2019 jyldy Jastar jyly dep jarııalady. «Jastar – el tiregi» arnaıy jobasy jumys isteı bastady. «Jas kásipker» atty jas­tar­dyń kásipkerlik bastamalaryn damytý baǵdarlamasy iske asyrylmaq. Prezıdent ulyqtaý saltanatynda jas­tardy jumyspen qamtý baǵdarlamasy engiziletinin aıtty. Sonymen birge jastardyń arman-maqsattaryn júzege asyrýǵa jáne jeke «tabystylyq ómir­baıa­nyn» qalyp­tas­tyrýyna barlyq múmkindikti berý qa­jet­tigin jetkizdi. «Pre­zıdenttiń ka­dr­­lyq rezervi» aıa­synda memlekettik qyz­mettiń bar­lyq deńgeıinde daryndy jas bas­qa­rýshylardy daıyndaý týraly min­det­teme qoıylyp otyr. «Bizdiń jas­tarymyz – maqsatker, eńbekqor, krea­tıvti, sondyqtan Qazaqstannyń kele­she­gi senimdi qolda» dedi Q.Toqaev.

Álbette, jastyń aty – jas. Bir ǵa­syr buryn jańa gúl ashqan baqshadaı jas­tardan úmit etken Mirjaqyp Dý­lat­uly «Halyqqa, jastar, basshy bol! Qarańǵyda jetektep» dep jazdy. Alash ardaqtysynyń jas býynnyń rý­hyn janyǵan sózi áli de ózekti. О́ıt­ke­ni qazirgi jedel ózgeristerge toly jahandyq syn-qaterlerge ýaqtyly jaýap qatý qajet. Bul rette zamannyń úni, oıy men talaby údesinen tabylatyn jastardyń qolyndaǵy qýatty resýrsty tıimdi paıdalanǵan lázim. Qazaqtyń qaı támsilin alsańyz da, úlken­ge izet, jasqa jol kórsetedi, «Jas kelse – iske» deıdi. Sondyqtan eldiń basqarý qu­ry­lymyndaǵy býyn alma­sýynyń júr­giz­il­ýi zańdylyq.

Búginde Qazaqstan halqynyń 3 mln 900 myńnan astamyn jastar quraıdy (22,5 paıyz). «Jastar» ǵylymı-zertteý ortalyǵynyń málimetinshe, elimizde memlekettik qyzmette júrgen óske­leń urpaqtyń úlesi az emes. Máse­len, bú­gin­de 22 myńǵa jýyq jas mem­le­kettik ákimshilik qyzmette eńbek etedi. Sondaı-aq ákimderdiń barlyq deńgeıinde el basqarý isine aralasyp júrgen 137 jas bolsa, 29 jasqa deıin jergilikti más­lıhattarǵa saılanǵan 184 depýtat bar eken. Ortalyq dırektory Tal­ǵat Qalıevtiń aıtýynsha, elimizde Pre­zı­denttiń kadrlyq rezerviniń túzilýi – qup­tar­lyq bastama. Bul rette jastardyń kúsh-jigeri, jańa ıdeıalardy alyp kelýi jáne jastyq maksımalızmi de qoǵamnyń alǵa jyljýyna aıtarlyqtaı yqpal etpek. Sondaı-aq bul elimizdegi jo­ǵa­ry laýazymdarǵa jas býynnyń kelýine jol ashady.

Jalpy, buǵan deıin elimizde Úki­­­met, jekelegen vedomstvolar men Nur Otan partııasynyń, jer­­gi­­lik­ti ákimdikterdiń kadrlyq re­zer­v­teri jasaqtalǵany belgili. Má­se­len, on shaqty jyl buryn Bi­lim jáne ǵylym mınıstrligi jas talant­ty, belsendi qazaqstandyqtar qatarynan eldiń basqarýshy kadrlaryn anyqtaý, irikteý, daıyndaý jáne tárbıeleýge baǵyttalǵan «Jastar kadrlyq rezervi» jobasyn iske asyrdy. Sondaı-aq elimizdegi bas partııa da kadrlyq rezervti qalyptastyrýǵa kúsh jumsap, olardyń qatarynda jas býyn men áıelder qaýymynyń da kem bolmaýyn qozǵap, qoldap keledi. Al memlekettik qyzmetshiler arasynda kadrlyq rezerv «A» korpýsy boıynsha irikteletini belgili. Dese de, bul rezervterden qoǵamnyń jappaı súıispenshiligine bólengen iri tulǵalar shyǵa qoıǵan joq. Ba­sym bóligi nomenklatýralyq oryn­daý­shylyq deńgeıde qalyp qoıdy. Sarapshylardyń aıtýynsha, endi jasaqtalatyn «Prezıdenttiń kadrlyq rezervine» engen jastar mansaptyq turǵyda úlken keńistikke shyǵýǵa múmkindik alady. Bul memlekettik basqarý qurylymyna qan júgirtýge, halyqpen ashyq ári senimdi dıalog ornatýǵa, kúrmeýli máseleni der kezin­de sheshýge, eń bastysy basqarý qury­ly­myn jasartýǵa septigin tıgizbek.

Damyǵan elderde kadrdyń qadiri joǵary. Olar osy baǵytta ornyq­ty taldaýlar júrgizedi. Máselen, ótken ǵasyrdyń sekseninshi jyldary AQSh-ta júrgizilgen áleý­met­tik zertteýlerde kadrlyq rezerv­ti ázirleýge qomaqty shyǵyn jum­­saǵan kásiporyndardyń 40 paıyzyn­da mamandardyń turaqsyzdyǵy baı­qal­ǵan. Munyń basty sebebi retinde kadrlyq rezervpen jumystyń durys uıymdastyrylmaýy, ıaǵnı tıisti la­ýazymǵa úmitkerdi baǵalamaý, qyz­­metkerlerge kúsh-jiger berýdiń jet­ki­liksizdigi jáne mansaptyq ósý ke­le­­sheginiń bolmaýy, sondaı-aq qyz­metkerlerdiń óz bilimi men biligin to­lyq paıdalana almaýy áser etkeni atalady. Sondyqtan batys áleminiń iri korporasııalary búginde kadrlyq rezervti ázirleýde qatelikterden qashýǵa kóp kóńil bóledi. Bul rette kadr ázirleýden buryn ár qyz­met­ker­diń kásiporyn keleshegine qosar úlesi erekshe eskeriledi.

Jaqsy basshy – eldiń týy. Qazirgi qoǵamda at ústinen ıt qabar jaman emes, qar ústine ot jaǵar jaqsy maman, bi­likti basshy kerek. Osyǵan deıin ulttyq kompanııalardyń menedjerlik toby maıly jilikke balanyp, «barmaq basty, kóz qystymen» erketotaılarǵa jol berilgeni de shyndyq. Al «Pre­zı­denttiń kadrlyq rezervi» shyn mánindegi halyqshyl, isker, qara­pa­ıym, ary taza basqarýshylar mektebine aınal­ýy tıis.

Sońǵy jańalyqtar

QHL: «Barys» «Vıtıazge» jol berdi

Hokkeı • Búgin, 19:35

«Egemenge» jazylyńyz – syılyq utyp alyńyz!

Egemen Qazaqstan • Búgin, 19:08

Kýrchatovta AES salynýy múmkin

Qazaqstan • Búgin, 18:02

Qyrǵyzstanda tynyshtyq kúni ornady

Álem • Búgin, 12:30

Koronavırýstyń jańa shtammyna ataý berildi

Koronavırýs • Búgin, 11:37

Vaksına saldyrǵandar sany artty

Koronavırýs • Búgin, 09:35

Pavlodar oblylysy «qyzyl» aımaqtan shyqty

Koronavırýs • Búgin, 09:16

905 adamnan koronavırýs anyqtaldy

Koronavırýs • Búgin, 09:08

Uqsas jańalyqtar