Ákim Y. Dúkenuly, A. Panfılov, Sh.Ýálıhanov kósheleriniń qıylysyndaǵy qurylysy júrip jatqan «Garant» KTK nysanyn aralap shyqty. Jalpy aýdany 17,602,80 sharshy metr bolatyn 330 páterge eseptelgen problemaly nysannyń qurylysy «Azbýka jılıa» kompanııasynyń tobymen 2011 jyly bastalǵan bolatyn. Qurylysty aıaqtaý úshin 2016 jyly nysan «Orda Injınırıng» JShS-ǵa ótkizildi. Úleskerlerdiń jalpy sany – 168 adam. Nysandy 2020 jyldyń sáýir aıynda paıdalanýǵa berý josparlanyp otyr.
«Ár apta saıyn bir-eki problemaly kóppáterli turǵyn úılerdi aralap turamyn. Josparly keste túzildi. Qurylystyń aıaqtalý prosesin jáne sozylyp ketken úleskerler máselesiniń túbegeıli sheshimin tabýdy baqylaýda ustaımyn», dedi ákim.
Sondaı-aq, ákim Shubar turǵyn alabynyń Qalqaman jáne Narkesken kósheleriniń qıylysynda ornalasqan «Komfort de Luxe» TK qurylys alańyna bardy. Jalpy aýdany 15 734,50 sharshy metr bolatyn 216 páterge arnalǵan turǵyn úı kesheniniń qurylysy 2012 jyly bastalǵan. Bul nysan boıynsha úleskerlerdiń jalpy sany – 227 adam. Qurylysty 2019 jyldyń jeltoqsanynda aıaqtaý josparlanyp otyr.
