Memleket basshysy osymen besinshi márte jalaý kótergen «Aıbyn» respýblıkalyq áskerı-patrıottyq jastar jıynynyń saltanatty ashylý rásimine qatysyp, sóz sóıledi. Sharada, sondaı-aq Qorǵanys mınıstri general-maıor Nurlan Ermekbaev pen Qaraǵandy oblysynyń ákimi Erlan Qoshanov boldy.
«Spassk» oqý ortalyǵynyń polıgonynda elimizdiń barlyq óńirinen kelegen áskerı-patrıottyq klýbtardyń 600-den astam tárbıelenýshileri, «Jas sarbaz» qozǵalysynyń músheleri bas qosty. Apta boıy jasóspirimder dene shynyqtyrý daıarlyqtaryn jetildirip, jarystar men oıyndarda áskerı-qoldanbaly mashyqtaryn kórsetedi. Jıynǵa qatysýshylar qurdastarymen jaqynyraq tanysyp, jańa dostar tabý múmkindigine ıe boldy. Jas ulandar úshin baıqaýlar, sporttyq jarystar jáne qyzyqty adamdarmen kezdesýler uıymdastyrylady.
Jastar aldynda sóz sóılegen Prezıdent Qasym-Jomart Toqaev barlyq kúsh-qýatty ómirdegi basty maqsattarǵa jumsaýǵa shaqyrdy.
– Otanymyzǵa adal, jaýapkershiligi joǵary, qaıratty jáne qaısar jastarymyzdyń basyn qosqan bul jıynnyń mán-mańyzy erekshe. Biz Táýelsiz elimizdiń búgingi jastaryna árqashan zor úmit artamyz, senemiz. Qazaqstannyń árbir jetistigi ózderińiz sııaqty jas órenderdiń alańsyz, jarqyn keleshegi úshin jasalǵan qadam. Búginde elimizge barsha álem qaýymdastyǵy qurmetpen qaraıdy. Memleketimiz qarqyndy damýda. Munyń barlyǵy tarıhı turǵydan alǵanda qysqa merzimde atqarylǵan tabandy eńbektiń nátıjesi. Elimizdiń abyroıyn arttyrý sizderdiń Otan aldyndaǵy qasterli boryshtaryńyz. Jaqsy dástúrge aınalǵan «Aıbyn» áskerı-patrıottyq jastar jıyny otanshyl jastardy adal qyzmet etýge, el qorǵany bolýǵa tárbıeleıtin biregeı alań, – dedi Memleket basshysy.
Sonymen qatar, Prezıdent ómirde eń bastysy – adamdyq parasattylyq, bilim, joǵary kásipqoılyq jáne óz Otanyna adaldyq ekenin atap ótti.
– Elimizde jas qazaqstandyqtar arasynda patrıotızmdi qalyptastyrý men tárbıeleýge úlken mán beriledi. Osy maqsatta «Jas sarbaz» respýblıkalyq balalar-jasóspirimder áskerı-patrıottyq qozǵalysy quryldy. Áskerı-patrıottyq klýbtar men synyptar sany 6 myńǵa jetti, olarda 174 myń bala bilim alyp júr, – dep atap ótti Qasym-Jomart Toqaev.
«Aıbyn» respýblıkalyq áskerı-patrıottyq jastar jıynynyń ashylý saltanatynda teatrlandyrylǵan kórinis qoıylyp, onda batyrlar urpaqtarynyń baılanysy ulyqtaldy. Al lańkesterdi zalalsyzdandyrý boıynsha shartty kórneki operasııada kórermenderge zamanaýı qarý-jaraq túrleriniń múmkindikterin kórsetildi. Bul sharaǵa artıllerııa, tankter jáne áýe tehnıkasy – tikushaqtar men joıǵysh ushaqtar qatystyryldy.
Qasym-Jomart Toqaev sondaı-aq dala lagerin aralap, oqý ortalyǵynyń jaǵdaıymen tanysty.
Spasskide Prezıdent pen jas patrıottar 2050 jylǵy qazaqstandyqtardyń bolashaq býynyna joldaý jazylǵan «ýaqyt kapsýlasyn» saldy. Bolashaq Otan qorǵaýshylar robot tehnıkasy boıynsha bilimderin pash etip, saper, barlaýshy jáne basqa da robottardyń úlgilerin kórsetti. Jıyn qatysýshylaryna «Golos. Detı» baıqaýynyń jeńimpazy Erjan Maksım, mentaldi arıfmetıka boıynsha álem chempıony Ilıa Tohtahan, keýde kóterý boıynsha álemdik rekordshy Ámir Mahmet, shahmattan bes dúrkin álem chempıony Bıbisara Asaýbaevamen áńgimelesý múmkindigi týdy.
«Aıbyn» respýblıkalyq áskerı-patrıottyq jıyny 22 maýsymda aıaqtalyp, saıys qorytyndysynda úzdik komandalar men erekshe kózge túsken órender anyqtalady.
Qaraǵandy oblysy
