Elbasy konferensııada sóılegen sózinde elimizdiń birinshi basshysy laýazymyndaǵy búkil qyzmeti Qazaqstandy damytýǵa arnalǵanyn atap ótti.
Nursultan Nazarbaev memleketti qurý jolyndaǵy jáne egemendi eldi qalyptastyrýdaǵy qıyndyqtar týraly aıtty. Sonyń ishinde, Qazaqstannyń Tuńǵysh Prezıdenti toqsanynshy jyldardyń basynda elimizdegi ulttyq ekonomıkanyń qıraýyna, etnosaralyq qaqtyǵystardyń paıda bolý qaýpine baılanysty jaǵdaı jóninde aıtty.
– Qazaqstan demografııalyq quldyraý sheginde turdy. 1989 jylǵy halyq sanaǵyna sáıkes, baıyrǵy halyq – qazaqtar 39 paıyz nemese 6,5 mıllıonnan sál ǵana astam adam boldy. Sol kezeńdegi aýyr ekonomıkalyq ahýal halyqtyń Qazaqstannan kóptep kóship ketýine alyp keldi. Ol jyldary ortasha ómir súrý jasy 5 jylǵa qysqardy, týý kórsetkishi birden tómendedi, – dedi Nursultan Nazarbaev.
Elbasy táýelsizdiktiń alǵashqy jyldary Qazaqstan kólik qatynastarynyń teńgerimsizdigi men ekologııa máselesi kúrdeli tehnologııalyq turǵydan eń artta qalǵan respýblıkalardyń qatarynda boldy.
Qazaqstannyń Tuńǵysh Prezıdenti elimizde qabyldanǵan baǵdarlamalardyń jáne ótkir áleýmettik-ekonomıkalyq máselelerdi sheshýge baǵyttalǵan damý strategııasynyń júzege asyrylý nátıjelerine toqtaldy.
Sonymen qatar, Nursultan Nazarbaev álemdik damý úderisine áser etetin strategııalyq syn-qaterlerdiń birneshe tobyn atap kórsetti. Atap aıtqanda, qarqyndy ári úzdiksiz tehnologııalyq tolqyn, kezekti ındýstrııalyq revolıýsııaǵa baılanysty ekonomıkalyq paradıgmanyń aýysýy, álemdegi geosaıası jaǵdaıdyń ózgerýi, túrli sıpattaǵy jahandyq deńgeıdegi qaqtyǵys.
– Halyq pen Prezıdent árqashan birge bolýǵa tıis. Sonda ǵana jetistikke jetemiz. Meniń aǵa býyn ókilderine aıtarym, sizderdiń danalyqtaryńyz jastardyń durys jolmen júrýine, Otandy súıýine, memleketti nyǵaıtýyna, Táýelsizdikti qorǵaýyna jáne jarqyn bolashaq úshin eńbek etýine járdemin tıgizýi tıis. Orta býyn ókilderine aıtarym, sizderdiń jınaǵan tájirıbelerińiz – qıyndyqtardy eńserý jolynda bárimizge kómegi tıetin baǵa jetpes kapıtal. Al, jastarymyzǵa aıtarym, jaqsy ómir súrýdiń bir ǵana joly bar – ol eńbek etý. Elimizdiń keleshek jolyn sizder anyqtaısyzdar, – dedi Elbasy.
