Ulybrıtanııanyń Premer-Mınıstri Tereza Meıdiń Qasym-Jomart Toqaevty Qazaqstan Prezıdenti laýazymyna saılanýymen quttyqtaǵan jedelhaty kelip tústi.
«27 naýryzdaǵy quttyqtaý hatymda Brıtan-Qazaqstan qatynastarynyń nyǵaıyp kele jatqanyn atap óttim. Sol sátten bastap elderimiz arasyndaǵy baılanystardyń arta túskenine qýanyshtymyn», – dep jazǵan Tereza Meı.
Birikken Koroldiktiń Mınıstrler kabınetiniń basshysy ekijaqty is-qımyldardy odan ári damytýdyń mańyzdylyǵyn atap ótti.
«Sizdiń prezıdenttik qyzmetińizdiń barysynda Ulybrıtanııa men Qazaqstan arasyndaǵy saıası, ekonomıkalyq jáne mádenı salalardaǵy yntymaqtastyqtyń jalǵasa beretinine, sondaı-aq, elderimiz arasyndaǵy ózara qarym-qatynastardyń odan ári nyǵaıa túsetinine senimdimin», – delingen jedelhatta.
