Túrkistan oblysynyń ákimi О́mirzaq Shókeev, QR Qorǵanys Mınıstri Nurlan Ermekbaev jáne QR Tótenshe jaǵdaılar jónindegi komıtet tóraǵasy Vladımır Bekker Arys qalasyndaǵy tótenshe jaǵdaıǵa qatysty Ordabasy aýdany, Aqjol aýyly, Jambyl mektebinde brıfıng ótkizdi. Olar halyqty alańdatqan saýaldarǵa jaýap berip, naqty málimettermen bólisti.
«Qazirgi tańda shuǵyl sharalar qolǵa aldyq. Jarylys masshtabyn kórgen soń, birden turǵyndardy evakýasııalap, jeldiń baǵytyna qaraı úsh lager jasaqtadyq. Arys qalasyn saǵat saıyn aralap, kezdesken turǵyndardy qutqarý operasııasyn júrgizýdemiz», dedi О́. Shókeev.
Qazirgi tańda Arys qalasyndaǵy tártipti qadaǵalaý úshin 345 polısııa qyzmetkeri jumys istese, qosymsha Ulttyq gvardııanyń 500 sarbazy kómekke kelgen.
Sondaı-aq oqıǵa ornynda 75 arnaıy kólik, 51 shuǵyl járdem ekıpajy qyzmet etýde. 105 avtokólik turǵyndardy evakýasııalaýǵa jumyldyrylǵan.
Túrkistan oblysy men Shymkent qalasy boıynsha TJD tarapynan 359 qyzmetker, 40 birlik arnaıy tehnıka jumys isteýde.
Turǵyndardyń negizgi bóligi qaladan ózderi ketken. Sońǵy saǵatta 1616 adam eldimekennen kóshirildi. Ordabasy aýdany, Tórearyq aýylyndaǵy Táýkehan mektebinde evakýasııada otbasynan kóz jazyp qalǵan balalar jınalýda. Olardyń fotosýretteri Túrkistan oblysynyń resmı paraqshasynda jarııalanady. Densaýlyq saqtaý basqarmasynyń málimetinshe, zardap shekkender sany – 31. Aýyr jaraqat saldarynan 1 adam qaıtys boldy. Bul málimet áli de naqtylaný ústinde.
