Azamattyq qoǵamdy damytý – basty nazarda

Eseptik kezdesýge Par­la­ment depýtattary, Prezı­dent ákimshiliginiń, Premer-Mı­nıstr keńsesiniń qyzmet­ker­leri, Qoǵamdyq keńes múshe­leri, memlekettik jáne jeke kom­pa­nııalardyń, úkimettik emes uıymdardyń, qaýymdastyq­tar­dyń, din jáne jastar saıa­saty salasynyń, BAQ jáne taǵy basqa uıymdardyń ókilderi qatysty. Buǵan qosa, jıyn barysyn beınekonferensııa baılanysy arqyly oblystardyń jáne Nur-Sultan, Almaty, Shymkent qalalarynyń ákimdikteri kórip otyrdy. Son­daı-aq áleýmettik jelilerde de on­laın-rejimde kópshiliktiń na­zaryna usynyldy. Jalpy, óńir­lerdi qosqanda bul kezdesýge qatysýshylardyń sany shamamen 500 adamdy qurady.

Aqparat jáne qoǵamdyq da­­mý mınıstri Dáýren Abaev esep­­tik baıandamasyn bastamas­tan buryn oqys oqıǵaǵa baıla­nysty Arystaǵy aǵaıynǵa alań­daý­shylyǵyn bildirip, qaza tapqan azamattardyń týǵan-týystaryna qaıǵyra kóńil aıtty, jaraqat alǵan jurttyń tez saýyǵyp ke­týin tiledi. Bul tosyn­nan kelgen apat Arystyń ǵana emes, bú­kil halyqtyń qabyrǵasyn qaıys­tyrǵanyn, osyndaı syn saǵatta eldigimiz ben birligimizdi kórsete bilgenimizdi aıtty. Son­daı-aq mınıstr oqıǵa ornyna ózi barǵan Memleket basshysy Qasym-Jomart Toqaevtyń jaǵ­daıdy baqylaýǵa alǵanyn aıtyp, «Arys, biz birgemiz» atty aksııa uıymdastyrylyp jatqanyn atap ótti. Osy rette zardap shekken qalaǵa kómek qolyn sozǵan kópshilikpen birge mınıstrliktiń qyzmetkerleri de bir kúndik eń­­bek­aqylaryn aýdaratynyn má­lim­dedi.

Budan ári D.Abaev kezdesýdiń negizgi taqyrybyna oıysyp, osy jyldyń alty aıy artta qal­ǵanyn, osy ýaqyt aralyǵy túrli saıası oqıǵalar men aýqymdy is-sha­ralarǵa toly bolǵanyn tilge tıek etti jáne bul jıynǵa ótken­di saralap, bolashaqty baǵamdaý maqsatynda bas qosyp otyrǵandaryn aıtty.

– Aqparat, azamattyq qo­ǵam, qoǵamdyq kelisim, jas­tar jáne otbasy saıasatynyń negizgi baǵyttaryn pysyqtap alý – mańyzdy mindetterdiń biri. Eseptik kezdesýde osy baǵyt­tarǵa jeke-jeke toqtalyp ót­pekpin. Qazir aqparat salasy boıynsha bizdiń mınıstrlik tıisti zańdy jetildirý jumystaryn jalǵastyryp jatyr. Qajetti túzetýlerdi engizý josparymyzda bar. Atap aıtsaq, buqaralyq aqparat quraldarynda keıbir ónimderdi jarnamalaýǵa ty­ıym salýdy toqtatý, memlekettik tapsyrysty aımaq deńgeıindegi memlekettik satyp alý júıesinen shyǵarý, BAQ-ty salyqtan bosatý týraly túzetýler – nazarda. BAQ salasyn jańǵyrtý men sapaly televızııalyq kontent qalyptastyrý jumysy bir sát te toqtaǵan joq. Mysaly, Tamasha TV dep atalatyn ázil-syqaq baǵytyndaǵy birinshi telearna óz baǵdarlamalaryn kórermenderine usyna bastady. «El arna» telearnasy da damyp, bıyl habar taratýdyń jańa satysyna kóterildi. Taǵy bir jaǵymdy jańalyq, qazaq televızııasy kórshi elderde de kórsetile bas­tady. Bul – ózge memleketterde turyp jatqan qandastarymyz úshin qolǵa alynǵan shara. Uzaq júrgizilgen kelissózder nátı­jesinde reseılik spýtnıktik jáne kabeldik operatorlar óz jelileri arqyly bizdiń arnalardy kórsete bastaıdy. Bıyl sáýir aıynan bastap Reseıdiń «Mýlt» atty balalar arnasynda memlekettik tildegi qazaqstandyq ónimder berilýde, – dedi D.Abaev.

Budan keıin mınıstr otan­dyq telehıkaıalardy damytý jumystaryna toqtaldy. Onyń aıtýynsha, ótken jyly memlekettik tapsyrys aıasynda 46 teleserıal túsirilse, bıyl 43 serıal kórermenge jol tartqan. Sondaı-aq sıfrlyq teleradıohabarlardy taratýǵa kóshý jumystary kezeń-kezeńimen iske asyrylyp, búginde Mańǵystaý, Túrkistan, Jambyl oblystary jáne Shymkent qalasy tolyq sıfrlyq júıede jumys istep jatyr eken. Al bıyl Almaty oblysy, Pavlodar men Qostanaı aımaqtary sıfrlyq habar taratýǵa aýyspaq. Jalpy, bul baǵyttaǵy jumystar jospar boıynsha 2021 jyly aıaqtalady.

Sonymen qatar Aqparat jáne qoǵamdyq damý mınıstri «Ashyq Úkimet» portalyn damytý men qajetti normatıvti-quqyqtyq bazasyn qalyptastyrý boıynsha da irgeli ister atqarylǵanyn atap ótti. Máselen, ótken jyly osy jumystardyń nátıjesi boıynsha memlekettik organdardyń ashyq derekteriniń ózektiligin tolyq 97 paıyzǵa jetkizipti. Mınıstrlik jergilikti atqarýshy organdar boıynsha ashyqtyqtyń úzdik úlgisin daıyndap jatyr eken. Bul máselede úkimettik emes sektor úlken kómek kórsetip otyr.

Ashyqtyq týraly sóz qoz­ǵalǵanda mınıstr azamattyq qoǵam qalyptastyrý týrasynda óz oıyn órbitti. Onyń aıtýynsha, memleket pen azamattyq qoǵam arasyndaǵy dıalogty nyǵaıtýda úkimettik emes uıymdarmen ózara is-qımyl boıynsha úılestirý keńesi qurylǵan. О́tken jyly qarasha aıynda Azamattyq forým ótkizildi. Búginde respýblıkada 229 qoǵamdyq keńes jumys isteıdi. Bular eki jylda 12 myńnan asa ÚEU jobalaryn qarap, qoǵamdyq tyńdaýlar uıym­dastyrdy. Buǵan qosa, D.Abaev Memleket bas­shysynyń tapsyr­masyna sáıkes 2025 jylǵa deıin aza­mattyq qoǵamdyq damytý tujy­rymdamasy ázirlenetinin málimdedi.

Sonymen qatar mınıstr 2020 jyly eriktiler jylyn ótkizýge daıyndyq qyzý júrgiziletinin, volonterlikti damytý aıasynda 2018-2020 jyldarǵa arnalǵan jol kartasy júzege asyrylyp jat­qanyn habarlady. Bıyl sáýir aıynda eriktilerdiń qyzmetin úı­lestirýge múmkindik beretin qazvolunteer.kz onlaın-tuǵyrnama iske qosylǵan.

Mınıstr dinı saladaǵy turaq­ty­lyqty qamtamasyz etý jáne ekstremızm men radıkalızmniń taralýynyń aldyn alý máseleleri boıynsha sóz qozǵady. Osy ba­ǵytta Nur-Sultan, Almaty jáne Atyraý qalalarynda des­trýk­tıvti dinı aǵymdardyń yqpalyna ushyraǵan adamdardy teris joldan qaıtarý úshin jumys isteıtin dinı ókilderdi daıarlaý kýrstary ótti. Budan 190 ımam men teolog ótken. Bul rette ol Ulttyq qaýipsizdik organdary «Jýsan» gýmanıtarlyq operasııasynyń 3 kezeńin sátti ótkizgenin, onyń sheńberinde qaqtyǵys aımaǵynan Qazaqstanǵa 524 azamat (137 áıel men 357 bala) oralǵanyn aıtty.

Etnosaralyq kelisim men dıasporalyq saıasat salasy boıynsha 2018 jyly «Qazaqstan halqy Assambleıasy týraly» Zań­ǵa ózgertýler engizilip, onyń jú­zege asyrýdyń jospary py­syq­taldy. Assambleıa­nyń 2025 jylǵa deıin damy­tý­dyń tujyrymdamasy bekitildi. Bul qu­jattaǵy ne­gizgi baǵyttardyń biri – otan­dastarymyzben qarym-qaty­nasymyzdy kúsheıtip, sheteldegi qazaq dıasporasyn qoldaýǵa ba­symdyq berý. Osy jumysty uıymdastyrý maqsatynda Elba­synyń tikeleı tapsyrmasy­men 2017 jyly «Otandastar qory» qurylǵan. Mınıs­tr­lik atal­ǵan qormen birle­sip, qazaq dıasporalarymen má­de­nı-gýmanıtarlyq baı­lanysty nyǵaıtyp, bilim berý, ana tilin esten shyǵarmaý ba­­ǵyt­tary bo­ıynsha keshendi jumys­tardy qolǵa alǵan.

Dáýren Abaev baıandamasynyń sońynda Jastar jylyna arnaıy toqtalyp, mınıstrlik jastarǵa arnalǵan arendalyq baspana berý erejelerin ázirlegenin, ol 1 tamyzǵa deıin bekitiletinin aıtty. Sondaı-aq jastardyń kásipkerlik bastamalaryn qoldaý úshin «Jas kásipker» jobasy da­ıyndaldy.

Esep berý kezdesýinen keıin mınıstr BAQ ókilderine arnap brıfıng ótkizdi.