«Bleız» estradalyq bı stýdııasynyń jetekshisi Lıýbov Kornıýhınanyń aıtýynsha, óner baıqaýy Ion teńiziniń jaǵalaýynda ornalasqan kýrorttaǵy «Alexandreio» konsert zalynda ótipti.
Halyqaralyq-estradalyq bı baıqaýyna Belorýssııa, Reseı, Ýkraına, Grýzııa, Grekııa, Lıtva, Moldova elderinen kishkentaı qatysýshylar kelgen.
Oqýshylar saraıynyń «Bleız» estradalyq bı stýdııasynyń bıshileri «Armandar oryndalady», «Erkin tynys», «Dala áýenderi», «Keńistik», «Jańǵyrý», «Bir kúni» atty ártúrli taqyryptaǵy shyǵarmalardy oryndady.
Grekııaǵa shaqyrtý alǵan bı stýdııasynyń bı kompozısııalary erekshe, teatrlandyrylǵan, ashyq, qımyl-qozǵalysty sıýjetterimen erekshelenipti. Repertýarǵa saı tigilgen bı kostıýmderiniń ulttyq naqyshtaǵy kolleksııalary kórermenderdi tańǵaldyrǵan.
«Bleızdiń» «Tıp-Top» atty daıyndyq tobynyń kishkentaı bıshileri Arına Kazakova, Saıda Maralbaeva, Lıýdmıla Sologýb, Sabına Seıitkárimderge halyqaralyq qazylar alqasy bıleriniń ártúrliligi men qyzyqty sıýjetteri úshin joǵary baǵa beripti.
– Árıne baıqaýǵa qatysqan barlyq elderdiń bıshileri kásibı deńgeılerin kórsetti. Bizdiń bıshiler bılegen «Dala saǵymdary» atty qazaqtyń ulttyq bıler toptamasy shyǵystyq ózindik órnekterimen tańǵaldyrdy. Bizdiń bıshiler 6 birinshi oryn ıelendi. Gala-konsert pen marapattaý rásimi Jerorta teńizi palmalarymen qorshaǵan Lýtrakı kýrortynyń ortalyq alańynda ótti, – deıdi Lıýbov Kornıýhına.
Al bıshilerimizdiń alys shetel kórermenderiniń yqylasyna bólenýine bı úıirmesiniń jetekshileri Irına Rýdenko, Dına Gımazetdınova, Anjelıka Býlıch, sondaı-aq baıqaýǵa qatysýshylardyń ata-analary úles qosypty.
PAVLODAR
