Arys aýdandyq ortalyq aýrýhanasyna 24 maýsym kúni tańǵy saǵat 8.00 shamasynda túsken Kenje Bekasyldy 8.30-da Bosaný bóliminiń akýsheri Naǵıma Zorymbaeva óz aýysymyna qabyldap alady. Negizinde qursaqtaǵy bala iri jáne anasynyń búıreginde aqaý bolǵandyqtan Shymkent qalasyna aparyp bosandyrý josparlanǵan. Biraq jaǵdaı oǵan qaratpaıdy. О́mir men ólim arasynda arpalysqan kelinshek endi aıtyp kelmeıtin apatqa tap bolady.
«Biz aýrýhana esiginen shyǵa bergende qatty jarylystan jer dúmpidi. Jedel járdem kólikteriniń barlyǵy reanımasııadaǵy balalardy tasyp ketken. Akýsherim Naǵıma Zorymbaeva men kómekshisi Olga Álipbaeva alǵashqy kómekke qajetti zattardy salyp aldy da, meni ertip áskerıler kórsetken baǵytqa qaraı bettedi. Shynyn aıtsam, mende tek qorqynysh boldy. Aman qalamyn dep úmittengen de joqpyn. Biraq baǵyma qaraı qasymnan tek jaqsy adamdar tabylyp otyrdy. Bir saǵattaı jaıaý júrgen soń óne boıyn órt shalǵan sarbazdyń kóligine otyrdyq. Ol da bizdi alysqa apara almaıtynyn aıtyp keri qaıtty. Ekinshi ret mingen kóligimizdiń benzıni taýsylyp jolda qaldy. Jaıaý jalpylap kele jatqanymyzda Dosmuhamet esimdi balanyń mashınasy kez boldy. Ol bizdi Montaıtas aýylynyń medpýnktine aparmaqshy bolǵan. Alaıda jan-jaqtyń bári tútin, eshteńe kórinbeıdi. Qyrmen júıtkitip kelemiz. Jol joq. Adasyp Qazyǵurttyń tas jolynan biraq shyǵyppyz», dep oqıǵany eske aldy kelinshek.
«Biz aýrýhanadan saǵat 9.30 shamasynda shyqtyq. Mańaıdaǵy eshbir aýyldyń aýrýhanasy tótenshe jaǵdaıǵa baılanysty jumys istemeıdi. Barlyǵy syrtqa qashyp jatyr. Saǵat 12-den asty. Kenjeniń tolǵaǵy jıileı bastady. Jol keptelis. Dosmuhamet kólikten basyn shyǵaryp, bosanǵaly jatqan kelinshek bar ekenin aıtyp alyp shyqty. Joǵary jyldamdyqpen quıǵytyp bóten aýyldaǵy beıtanys kisiniń úıine tústik. Aqtas degen aýyl ekenin keıin bildik. Úı ıesi Gúlmıra esimdi apaı bizge bir bólmesin bosatyp berip, kem zattarymyzdyń barlyǵyn zyr júgirip tolyqtady. Kólikte bizden basqa Arysqa UBT ótkizýge kelgen Bilim jáne ǵylym mınıstrliginiń úsh ókili bolǵan. Bosandyrýǵa olar da kómektesti. Saǵat 12.58-de salmaǵy 4,2 kılo qyz bala dúnıege keldi», deıdi akýsher N.Zorymbaeva.
Kenjeniń aıtýynsha, bala kindigine oralyp tunshyǵyp qalǵan. Soǵan qaramastan,
25 jyldan asa tájirıbesi bar maman Naǵıma Zulbyqarqyzy táýekelge bel býǵan kórinedi. «Álim quryp ketkendikten
bosanatyn kezde talyp qala berdim. Bala týylǵanda kógerip ketken, dybysy shyqpaıdy.
Massaj jasap, ústine sý shashyp júrip oıatty. Osyndaı qıyn jaǵdaıda bizdiń aman qalýymyzǵa
birden-bir sebep bolǵan Naǵıma apaıdyń biliktiligi dep esepteımin. Kásibine degen
netken adaldyq?! Kómekshisi ekeýi jol boıy óz bala-shaǵasynan habar almastan, meniń
qasymnan bir eli alystamady. Dosmuhamet te bizdi ýaqtyly jetkizgen. Sál keshikkende
ne bolaryn elestetkim de kelmeıdi. Rızashylyǵymdy jetkizý úshin qyzymnyń esimin Dosmuhamettiń
anasynyń atymen Kámıla dep qoıdyq. Qyzymnyń kindigin kesken Bilim jáne ǵylym mınıstrliginiń
ókili, atyraýlyq Balbópe apaı kindik sheshe atandy. Bizge baryn aldymyzǵa tosqan,
nemeresiniń bar kıimi men jaıalyǵyn daıyndap bergen Aqtastaǵy Gúlmıra apaǵa alǵysym
sheksiz. Qazir esime alyp, Allaǵa shúkirshilik etip otyrmyn», deıdi bosanǵan ana.
Biz qıyn-qystaý sátte óz bastaryna tóngen qaterge qaramastan, judyryqtaı jumylǵan janashyr jandardyń barlyǵyna habarlasýǵa tyrystyq. 24 jastaǵy Dosmuhamet О́mirtaev Ulttyq qaýipsizdik komıtetinde qyzmet etedi eken. Búginde Arysta jumysyn jalǵastyryp jatqan ol bul isterin azamattyq boryshy dep biledi. «Jol boıy qyrqynan shyqpaǵan nárestesin kóterip, eki balasyn ertken áıeldi jáne taıaqqa súıengen qart ájeni kóligime otyrǵyzyp aldym. Olardy kórshi aýylǵa – qaýipsiz jerge jetkizdim. Keıinnen BǴM-nyń úsh qyzmetkerin aldym. Sosyn osy tolǵatqan anaǵa tap boldym. Aqtasta ol kisi bosanǵan soń jedel járdem shaqyryp, salyp jiberdim de, UBT ótkizýge kelgen qyzmetkerlerdi Mekemtastaǵy mektepke aparyp, dırektoryna tapsyrdym», deıdi Dosmuhamet. Jedel járdem Kenjeni Qazyǵurt ortalyq aýrýhanasyna jetkizgen. Búginde ana men balanyń jaǵdaıy jaqsy. Ekinshi qyzyn qushaǵyna alǵan ana búgin otbasymen qaýyshatynyn aıtyp qýandy.
Keshe Bilim jáne ǵylym mınıstri Ashat Aımaǵambetov jas áıeldi bosandyrýǵa kómektesken Atyraý munaı jáne gaz ýnıversıteti О́ndiristi avtomattandyrý jáne aqparattyq tehnologııalar kafedrasynyń dosenti Balbópe Ýtenova, Shákárim atyndaǵy Semeı memlekettik ýnıversıteti Ekologııa jáne qorshaǵan ortany qorǵaý kafedrasynyń meńgerýshisi Janat Nurjumanova, Semeı qalasyndaǵy Qazaq ınnovasııalyq gýmanıtarlyq-zań ýnıversıtetiniń aǵa oqytýshysy Shaıza Doskeevaǵa mınıstrliktiń Qurmet gramotasyn tabystap, erlikterin joǵary baǵalady. Jumys babymen joldary Arysta túıisken Atyraý men Altaıdyń pedagogtarynyń apattaǵy jankeshtiligi kimge bolsa da úlgi. «UBT kezinde JOO qyzmetkerleri mınıstrlik ókilderi retinde ár jaqqa bólinip test alamyz. Bıyl 12 adam Arys qalasyna bardyq. 22-23 maýsym kúnderi eki lekpen UBT qabyldadyq. Úshinshi kúni, ıaǵnı 24 maýsym kúni mektepte apellıasııa ótkizip jatqan kezde jarylys bastaldy. Eshteńege qaraýǵa shamamyz bolǵan joq. Janat, Shaıza úsheýimiz tobymyzdan adasyp, halyq bettegen jaqqa qaraı júgire berdik. 10 metrdeı jerge kep snarıadtar túsip, jarylyp jatty. Uzaq júrgennen keıin Dosmuhametke keziktik...», deıdi Balbópe Ýtenova.
«Balapan basyna, turymtaı tusyna» bolsa-daǵy, alapat apat arasynda kez kelgen jan úshin basyn báıgege tigetin adamdardyń az emes ekenin osy bir oqıǵanyń ózi kórsetip turǵan joq pa?!. Iá, asyl qasıetten aınymaǵan adamdar aramyzda!
Maıgúl SULTAN,
«Egemen Qazaqstan»
