Arys qalasyndaǵy tótenshe jaǵdaıǵa baılanysty halyqty qaýipsiz jerge kóshirý barysynda batyr ulandarymyz qańǵyǵan oq pen jaryqshaqtardan saqtana júrip qarapaıym adamgershilik qaǵıdalarynyń ozyq úlgisin kórsete bildi. Bul – obektıvke ilikken bir ǵana sýretti dálel. Oqıǵa ornynan jetken júzdegen fotosýret pen beınekadrlarda sarbazdardyń áıelder men balalardy, qart kisilerdi keýdesimen qorǵap, evakýasııalaǵan sátteri Arystaǵy qandastarymyzdyń jaǵdaıyna alańdap, ishteı duǵa qylyp, kóz jastaryn shylaǵan talaı otandastarymyzdyń rızashylyǵyn týǵyzdy.
IIM TJ komıtetiniń baspasóz qyzmeti myna sýrette áıel adamdy mashınaǵa kóterip mingizýde bireýi tizerlep arqasyn tosyp, qalǵandary qoltyǵynan demep jatqan Shymkent qalasy Tótenshe jaǵdaılar departamentiniń órt sóndirýshileri Abylaı Babahan, Beksultan Ibadýlla, Úsen Qazybek, Eldar Qyryqbaev ekenin habarlady. Olar Arys qalasynan Shymkenttegi evakýasııalaý beketine kezekti topty attandyrýda.
Bul sýret órt sóndirýshilerdiń jaýyngerge tán erlik isterimen qatar, kisiliktiń, kishiliktiń dáleli retinde tarıhta qalary anyq.
