25-27 maýsymda Senattyń Qarjy jáne bıýdjet komıtetiniń tóraǵasy Olga Perepechına Tokıoda «Women Political Leaders» qory men Japonııa Parlamenti О́kilder palatasy uıymdastyrǵan «Turaqty damý salasyndaǵy maqsattardy iske asyrý arqyly qoǵamdy damytýǵa arnalǵan sharalar qabyldaý» taqyrybyndaǵy saıası kóshbasshy áıelderdiń sammıtine qatysty.
Japonııa ókilder Palatasynyń tóraǵasy T.Osıma sammıtke qatysýshylarǵa arnaǵan sózinde qoǵamnyń saıası jáne ekonomıkalyq ómirin damytýdaǵy kóshbasshy áıelderdiń erekshe rólin atap ótti.
Áıelder sammıti Azııa-Tynyq muhıt aımaǵynda alǵash ret ótip otyr. Álemde áıelder men erler arasyndaǵy teńdikke jetý jolynda áli de belgili bir kedergiler bar ekenin eskere otyryp, qatysýshylar áıelderdiń quqyqtaryn ilgeriletý jáne BUU Ornyqty damý maqsattarynyń ólshemderi arqyly olardyń qoǵam ómirine atsalysýyn ulǵaıtý máselelerin talqylady.
Eki kúnge sozylǵan pikirsaıystar qorytyndysy 28-29 maýsymda Osakada ótetin G20 Sammıtine qatysýshylarǵa tabys etiletin boldy.