Qoıan-qoltyq urys tartysqa toly boldy. О́ıtkeni, týrnırge sport sheberleri men úmitkerler de qatysty. Qaladaǵy áskerı jáne sporttyq klýbtardan iriktelip alynǵan kil myqtylar arasyndaǵy saıys joǵary deńgeıde ótti.
Naǵyz saıypqyran jigitterdiń aıqasy dep qoıan-qoltyq jekpe-jekti aıtýǵa bolady. Onyń ústine osyndaı sport túrin serik etken elimizdiń syrtqy jáne ishki tynshytyǵyn qorǵap júrgen azmattarymyzdyń myqty da epti bolǵany eldiń de kóńiline medet. Qoıan-qoltyq jekpe-jekte qarsylasyńdy, qol-aıaq bylaı tursyn, ońtaıy kelse kúrese ketip, qulaǵan sátte tyrp etkizbeı, 20 sekýnd ustaǵan soń, artynsha aýyrtý ádisin qoldaný arqyly jeńilgenin moıyndatýǵa bolady. Ashyq jarysta toǵyz komanda sapynda 100-ge jýyq áskerı qyzmetshi 9 salmaq dárejesinde óner kórsetti.
Bul sporttyq sharanyń maqsaty – qoıan-qoltyq urysty áskerı-qoldanbaly sport túri retinde damytý, áskerı oqytýdyń mańyzdy quraly retinde salamatty ómir saltyn nasıhattaý, sportshylardyń kásibı sheberligin jáne tóreshilerdiń biliktiligin arttyrý.
Buqaralyq sport pen salamatty ómir saltyn nasıhattaýdy maqsat tutqan dodanyń jeńimpazdary marapattaldy.
Jalpykomandalyq esepte Arnaıy jedel áreket etý jasaǵynyń jigitteri úzdik shyqty. Olardyń qanjyǵasynda 3 altyn, 1 qola medal bar. 65 keli salmaqqa deıin Amanbek Jamanqaraev, 85 kelide Salamat Almatov, 90 kelide Ernar Halyqov qarsylas shydatpasa, Asqar Abdýlla 3-oryndy qanaǵat tutty. Endi júldegerler respýblıkalyq kezeńde Qostanaı namysyn qorǵaıtyn bolady.
– Sportshylar bir-birin jaqsy biledi, sol sebepti týrnır tartysty ótti, osal jigit joq. Biz tyńǵylyqty daıyndyqtyń arqasynda jeńiske jettik, jeńimpazdardy quttyqtaımyn. Alda Tobyl-Torǵaı namysyn laıyqty qorǵaımyz dep senemin, – deıdi Arnaıy jedel áreket etý jasaǵynyń jattyqtyrýshysy Qýanysh Babaqaev.
Jekpe-jek – babalar úrdisiniń jalǵasy, bilektiler men júrektiler saıysy. Eldiń shetinde, jeldiń ótinde el qorǵany bolyp júrgen qatardaǵy jaýyngerler qurysh bilekti, er júrekti bolýlary tıis. Saıystyń jeńimpazy atanǵandar aldaǵy el kóleminde jalaýyn kóteretin dodada baqtaryn synap, óńir namysyn qorǵaıtyn bolady.
