Qazaqstan Prezıdentine azamattar tarapynan tutynýshylyq kepilsiz nesıelerdi tóleýge kómektesý týraly kóptegen ótinishter kelip túsedi.
«Áleýmettik jaǵynan áljýaz azamattar, bul – kóp balaly otbasylar, múgedek balalary bar otbasylar, jalǵyz asyraýshysynan aıyrylǵan otbasylar, ataýly áleýmettik kómek alýshylar, jetim balalar túrli sebepterge baılanysty ómirlik qıyn jaǵdaılarǵa tap bolyp, ózderine alǵan nesıelik mindettemelerdi óteı almaı júrgen jaǵdaılar bar», dedi Á. Smaıylov.
Atalǵan másele 500 myńǵa jýyq adamynyń problemasy. Sondyqtan da, Prezıdent teńdessiz áleýmettik qoldaý kórsetýge sheshim qabyldady, keshe tıisti Jarlyqqa qol qoıyldy. Jarlyqtyń maqsaty — ómirlik qıyn jaǵdaılarǵa tap bolǵan qazaqstandyqtarǵa járdemdesý, óz otbasylarynyń qarjylyq jaǵdaıyn jaqsartýǵa múmkindik berý.
Jarlyqta Úkimet pen Ulttyq bankke bir jolǵy aksııa retinde kelesi sharalardy qabyldaý tapsyryldy. Tikeleı ataýly qarjylaı kómek retinde joǵaryda atalǵan sanattyń árbir qaryz alýshysyna memleket ekinshi deńgeıli bankter men shaǵyn qarjy uıymdarynda negizgi boryshy men oǵan eseptelgen syıaqynyń jalpy 300 myń tg deıin qaryzyn jabady. Sonymen qatar, qaryz boıynsha jalpy bereshegi 2019 jylǵy 1 maýsymdaǵy jaǵdaı boıynsha 3 mln teńgeden aspaıtyn bolýy kerek.
Bankter men shaǵyn qarjy uıymdarynda kepilsiz tutynýshylyq nesıeleri bar barlyq azamattar úshin 2019 jylǵy 1 shildedegi jaǵdaı boıynsha jınaqtalǵan aıyppuldar men ósimaqylar alynyp tastalady. Bul esepten shyǵarý ekinshi deńgeıli bankter men shaǵyn qarjy uıymdary esebinen júzege asyrylady.
Buǵan qosa, merzimi ótken bereshegi 90 kúnnen asyp ketken jeke tulǵalardyń barlyq kepilsiz tutynýshylyq qaryzdary boıynsha kredıtti berýmen jáne oǵan qyzmet kórsetýmen baılanysty turaqsyzdyq aıybyn, komıssııalar men ózge de tólemderdi esepteýge tyıym salynady.
«Prezıdenttiń pozısııasy — tutynýshylyq nesıelerge qatysty oryn alǵan jaǵdaı qaıtalanbaýy tıis», Á. Smaıylov.
Ulttyq bank retteý sıpatyndaǵy jáne qarjy uıymdarynyń ózderine shamadan tys táýekel alý boıynsha jaýapkershilikterin kúsheıtýge qatysty qajetti sharalardy qabyldaıdy. Qarjylyq jaǵdaıdy odan ári ýshyqtyrmaý úshin eń tómengi kúnkóris deńgeıinen tómen tabysy bar azamattarǵa qaryz berýge tyıym salynady. Ulttyq bank kepilsiz tutynýshylyq qaryzdar berý kezinde qosymsha retteý sharalaryn qabyldaıdy.
