Búgin QR Úkimetiniń alańynda ótken brıfıng barysynda QR bilim jáne ǵylym mınıstri A. Aımaǵambetov az qamtylǵan otbasylardyń balalaryn áleýmettik qoldaýdyń qabyldanyp jatqan sharalary týraly aıtyp berdi.
A. Aımaǵambetov 2019–2020 oqý jylyna QR Úkimeti Memleket basshysynyń tapsyrmasy boıynsha kóp balaly otbasylardyń balalary men ataýly áleýmettik kómek alýshylarǵa qosymsha 5 myń grant bóletinin aıtty. Atalǵan bilim berý granttary jalpy sıpattaǵy transfert arqyly jergilikti atqarýshy organdarǵa beriledi. Granttar bıylǵy 1 qyrkúıekten bastap bólinedi. Negizgi shart — UBT tapsyrǵan jáne onyń nátıjesi boıynsha ulttyq JOO-larǵa — keminde 65 ball, «pedagogıkalyq ǵylymdar» baǵyty boıynsha — keminde 60 ball, basqa JOO-larǵa — eń azy 50 ball jınaǵan túlekter bolýy tıis.
Granttar UBT nátıjesi boıynsha konkýrstyq negizde taǵaıyndalady. Oblystardyń, respýblıkalyq mańyzdaǵy qalalardyń jáne elordanyń ákimderi konkýrstyq komıssııalar qurady. Sonymen qatar, granttar bólinetin daıyndyq baǵyttarynyń tizimin jergilikti atqarýshy organdar óńirdiń joǵary bilimi bar mamandarǵa degen suranysyn eskere otyryp, derbes anyqtaıdy. Bilim grantynyń ıegerleri úshin 20 949 teńge mólsherinde shákirtaqy qarastyrylǵan. JAO bilim berý granttarynyń ıegerleriniń tizimi jergilikti buqaralyq aqparat quraldarynda jarııalanady.
A. Aımaǵambetov aldymen granttar jalpy bólinetinin aıtty. Bıyl 53 700 grant beriledi. Shamamen 1 tamyzda grant ıegerleriniń tizimi belgili bolady. Budan keıin grant almaǵan, alaıda azamattardyń áleýmettik álsiz tobyna jatatyndar óz ótinimderin bere alady. Qosymsha bilim granttaryn taǵaıyndaý konkýrsyna ótinimderdi qabyldaý 5-10 tamyz aralyǵynda bolady. Grant berý – 25 tamyzǵa deıin.
«Azamattar sanaty anyqtaldy, shegi bar, endi daıyndyqtyń belgili baǵyttary boıynsha qandaı balldar jınaǵanyna baılanysty bolady, ıaǵnı saralanady. Munda eshqandaı da jemqorlyq qaýipterine jol berilmeıdi», — dep túıindedi mınıstr.
