Búgin QR Úkimetiniń alańynda ótken brıfıngte ındýstrııa jáne ınfraqurylymdyq damý mınıstri R. Sklıar az qamtylǵan otbasylardyń turǵyn úı máselesin sheshýdiń qosymsha tetikteri týraly aıtyp berdi.
R. Sklıar atap ótkendeı, azamattardyń memleket tarapynan jalǵa beriletin turǵyn úı alýǵa quqyǵy bar. Turǵyn úı alýǵa ákimdikterde kezekte turǵan azamattardyń tizimi elektrondy túrde jarııalanady.
Tabys deńgeıi ár túrli muqtaj azamattardy turǵyn úımen qamtamasyz etý úshin eki baǵdarlama sátti iske asyrylyp jatyr: «Nurly jer» turǵyn úı baǵdarlamasy jáne «7-20-25» ıpotektalyq baǵdarlamasy, olarda turǵyn úı alýdyń túrli tetikteri qarastyrylǵan.
Sonymen qosa, a.j. aqpan aıynda «Nur Otan» partııasynyń XVIII sezinde QR Tuńǵysh Prezıdenti - Elbasy N. Nazarbaevtyń bergen jańa bastamalaryna sáıkes, az qamtylǵan otbasylardyń turǵyn úı máselelerin jyldamdatyp sheshý úshin az qamtylǵan kóp balaly otbasylarǵa, tolyq emes otbasylarǵa jáne múgedek balalardy tárbıelep otyrǵan otbasylarǵa arnalǵan qosymsha tetikter pysyqtaldy.
Mundaı otbasylarǵa jyldyǵy 2%-ben, bastapqy jarnasy 10%-ben 20 jyl merzmige nesıe beriletin bolady. Mundaı quqyǵyn jergilikti atqarýshy organdarda kezekte turǵandar paıdalana alady. Olar tıisti baǵyttaý qaǵazyn alyp, osy nesıeni alý úshin Turǵynúıqurylysjınaqbankine kelýleri qajet.
Kópbalaly otbasylar úshin jalǵa beriletin turǵyn úı salý jáne ony alý úshin respýblıkalyq bıýdjetten óńirlerge jyl saıyn 50 mlrd teńge nemese 7 jyl bloıy 350 mlrd teńge bólý qarastyrylǵan. Jyl saıyn 6 myń jalǵa beriletin páterdi satý iske asyrylady. Bul 7 jyl ishinde ákimdikterde resmı esepte turǵan kóp balaly otbasylardy 40 myń jalǵa beriletin turǵyn úımen qamtamasyz etýge múmkindik beredi (qazir kezekti 32 myń otbasy tur).
QR IIDM málimetterinshe, bıyl 3 165 jalǵa beriletin turǵyn úı qurylysy bastalǵan, 2 883 turǵyn úı birligin satyp alý josparlanǵan. Sonymen qatar búginde túrli qarajattardy tartýmen 1480 kóp balaly otbasy turǵyn úımen qamtyldy.
Budan soń azamattardyń az qamtylǵan sanattaryna arnalǵan jalǵa beriletin turǵyn úı qurylysyn arttyrý kózdelip otyr. Bul jumystar Ulttyq bankpen birlesip júrgiziledi. Jeke ınvestorlar men qurylys salýshylardy tartýmen jańa tetikter ázirlenedi.
Sondaı-aq Memleket basshysynyń tapsyrmasy boıynsha jumys isteıtin jastar úshin bıyl Nur-Sultan, Almaty jáne Shymkent qalalarynda 1 myńnan kem emes jalǵa beriletin páter salýdy jáne satyp alýdy qamtamasyz etý josparlanǵan edi.
«Bul josparlar qaıta qarastyryldy. Atalǵan úsh qalada jastarǵa 3 myń páter beriletin bolady. Bıyl da, 2020 jyly da, 2021 jyly da», — dedi R. Sklıar.
