«Memlekettik kirister komıteti kóleńkeli ekonomıkaǵa qarsy kúres sheńberinde páterdi zańsyz jalǵa berýshilerdi anyqtaý jumystaryn jalǵastyrýda. Vedomstvo qyzmetkerleri ártúrli memlekettik aqparattyq júıelerdiń derekteri men basqa aqparat kózderin paıdalanady. Bul PIK málimeti, sanaly azamattar men kórshilerden túsken aqparat bolýy múmkin» dedi Á.Súleımenov.
Aldyn ala jasalǵan qorytyndy boıynsha, qazirgi ýaqytta 3 jáne odan da kóp páterge menshik quqyǵy bar, alaıda dara kásipker retinde tirkelmegen jáne tıisti salyqtar tólemegen 20 myńnan astam tulǵa anyqtalǵan. Olardyń arasynda 10-nan astam páterge menshik quqyǵy bar 150 tulǵa bar, budan basqa bir tulǵanyń ıeliginde bir turǵyn úı kesheninde 65 páteri bar eken.
Joǵaryda keltirilgen derekter jalǵa berilýine egjeı-tegjeıli taldaý júrgiziletin qashyqtyqtan monıtorıng jasaý arqyly alyndy.
Jalpy, 2019 jyldyń 5 aı ishinde júrgizilgen jumys nátıjeleri boıynsha dara kásipker retinde 7 403 jeke tulǵa tirkeldi, bul byltyrǵy jylmen salystyrǵanda 22%-ǵa nemese 1320 jeke tulǵaǵa kóp. Salyqtyq túsim somasy 37 %-ǵa ósti jáne 7 252,1 mln. teńgeni quraıdy nemese 1 951,3 mln.teńgege kóp.
Súleımenovtiń aıtýynsha, jeke tulǵalardyń da, sondaı-aq zańdy tulǵalardyń da dara kásipker retinde tirkelmesten jyljymaıtyn múlikti «jalǵa» berýge quqyǵy bar ekenin atap ótken jón.
DK ashý úshin, jeke tulǵa salyq organyna ne bolmasa e-license saıty arqyly qyzmettiń bastalýy týraly habarlama elektrondy túrde jiberedi. Sondaı-aq, on kún ishinde salyq rejımin anyqtaýy qajet.
2018 jyldyń basynan bastap patent negizindegi salyq rejımin qoldanatyn DK úshin salyq mólsherlemesi, atap aıtqanda páterdi jalǵa berýshiler úshin 2%-dan 1% -ǵa deıin tómendedi. Bıýdjetti esepteýdiń mundaı shemasy jaldamaly eńbekti paıdalanbaıtyn jáne tabysy jylyna 3 528 AEK-ten aspaıtyn jeke tulǵalar úshin qoljetimdi. Máselen, eger jalǵa berýden túsetin tabys aıyna 100 000 teńgeni qurasa, tıisinshe, salyq somasy 1000 teńgeni quraıdy.
Eger siz birneshe páterdi jalǵa berseńiz jáne, mysaly, páterdi jınaý úshin jaldamaly jumysshylaryńyz bolsa, onda siz jeńildetilgen deklarasııany qoldana alasyz. Bul kezde salyq mólsherlemesi 3% quraıdy, tólem jarty jylda bir ret tabysty alý faktisi boıynsha júrgiziledi.
2019 jylǵy 1 qańtarynan bastap Qazaqstanda biryńǵaı jıyntyq tólem (BJT) engizilgen, ony dara kásipker retinde tirkelmesten kásipkerlik qyzmetti júzege asyratyn jeke tulǵalar tóleýge quqyǵy bar. Mundaı jeke tulǵalarǵa turǵyn úıdi jalǵa beretinderdi jatqyzýǵa bolady.
BJT tóleýshilerdiń tabys kólemi 1 175 AEK-ten aspaýǵa tıis ekendigin este saqtaý kerek.
2019 jyly biryńǵaı jıyntyq tólemniń aı saıynǵy mólsheri:
Ø 1 AEK - respýblıkalyq mańyzy bar qalalarda, astanada jáne oblystyq mańyzy bar qalalarda turatyn jeke tulǵalar úshin (2 525 teńge);
Ø 0,5 AEK - basqa eldi mekenderde turatyn jeke tulǵalar úshin (1 263 teńge) quraıdy.
BJT-di ekinshi deńgeıli bankter arqyly «Azamattarǵa arnalaǵan úkimet» Memlekettik korporasııasynyń bank shotyna tóleýge bolady.
Eger DK retinde tirkelmeı páterdi jalǵa berse, jalǵa berýden túsken tabys múliktik tabys retinde qarastyrylady. Iаǵnı, jyljymaıtyn múlikti jalǵa berýden túsken qarajatqa QR Salyq kodeksimen «salyq agenti» dep tanylmaıtyn tulǵalarǵa jeke tulǵa retinde 10% mólsherlemesi boıynsha salyq salynady. Bul rette mundaı jeke tulǵalarǵa memlekettik kirister organdaryna JTS boıynsha deklarasııany (240.00 nysany) 31 naýryzǵa deıin tapsyrady jáne eseptilik jylynan keıingi jyldyń 10 sáýirine deıin salyq tóleıdi.
Osyǵan baılanysty, Memlekettik kirister komıteti turǵyn úıdi jalǵa beretin azamattardy salyqtyq mindettemelerin óz erkimen oryndaýǵa shaqyrady.
