«Qorǵanys mınıstri Nurlan Ermekbaev Túrkistan oblysynyń ákimi О́mirzaq Shókeevpen birge qalanyń 17 sektoryndaǵy jedel shtabtardy aralap, halyqtyń suraqtaryna jaýap berdi. Jarylý qaýpi bar zattardan jappaı tazartý úshin Arys aýmaǵy 17 sektorǵa bólingen. Tańǵy saǵat 05.00-de tazartylǵan ýchaskelerge baqylaý júrgizildi. Aýmaqty tazalaý aıaqtalǵan soń Arys-1 jáne Arys-2 stansylarynan barlyq baǵyttaǵy poıyzdardyń qozǵalysy qalpyna keltirildi», delingen habarlamada.
Baspasóz qyzmetiniń málimetine súıensek, Qarýly Kúshterdiń radıasııalyq, hımııalyq jáne bıologııalyq barlaý toptary qalanyń radıasııalyq, bıologııalyq jaǵdaıyna tolyq monıtorıng júrgizgen. Radıasııalyq fondy ólsheý kezinde ýly jáne keri áser etetin zattar tabylmaǵan.
«Degenmen, qala aýmaǵynda saperler jasaǵy áli bolady Sondaı-aq áýeden turaqty baqylaý ornatylyp, áskerı qoıma aýmaǵy men oǵan irgeles jerlerge monıtorıng júrgiziledi. Olardan jetken aqparat jedel shtabqa túsip otyrady. Endi Qarýly Kúshterdiń jeke quramy Arys turǵyndaryna óz úılerine qaıta oralýǵa kómektesedi. Áskerı psıhologtar da elmen jumys istep, konsýltasııalar ótkizedi», delingen baspasóz málimetinde.
