Eki kúnge ulasatyn rýhanı sharanyń tusaýkeseri I.Jansúgirov atyndaǵy mádenıet saraıynda Almaty oblysynyń ákimi Amandyq Batalovtyń quttyqtaý sózimen bastaldy. Elbasy Nursultan Nazarbaevtyń «Rýhanı jańǵyrý. Bolashaqqa baǵdar» jáne «Uly Dalanyń jeti qyry» atty baǵdarlamalyq maqalalarynda aıtylǵan ulttyq qundylyqtar men rýhanı murany dáriptep, jańǵyrtý baǵytynda atqarylyp jatqan jumystarǵa toqtalǵan aımaq basshysy qazaq-qyrǵyz zııalylarynyń bas qosýyna sáttilik tiledi.
Jıyn barasynda sóz alǵan Qyrǵyz Respýblıkasynyń Tótenshe jáne О́kileti elshisi Jeenbek Kýlýbaev Qyrǵyzstan Prezıdenti Sooronbaı Jeenbekovtiń forýmǵa qatysýshylarǵa joldaǵan quttyqtaý hatyn oqyp berdi. Qyrǵyzstan Prezıdentiniń keńesshisi, jazýshy Sultan Raev ta qazaq-qyrǵyz zııalylarynyń ortaq rýhanı múdde turǵysynda eńbektenip, ádebıet pen óner álemindegi sabaqtastyqty óz sózine arqaý etti. Osyndaı jyly lebizdi quttyqtaýlar Qazaqstan jazýshylar odaǵynyń tóraǵasy, aqyn Ulyqbek Esdáýlet, tarıhshy-ǵalym Mámbet Qoıgeldıevter tarapynan da aıtyldy.
Sondaı-aq, osy jıynda halyqaralyq Túrki akademııasy daıyndaǵan «Manas eposy» kitabynyń tusaýy kesilip, zııaly qaýym nazaryna usynyldy. Munan keıin forým jumysy Almaty oblysynyń «Rýhanı jańǵyrý» jobalyq keńsesindegi zııalylar sımpozıýmyna jalǵasty. Sharalar legi erteń Kerbulaq aýdanynda jalǵasyp, qazaqtyń uly ǵalymy Shoqan Ýálıhanovtyń memorıaldyq kesheninde ótetin «Manas» festıvalimen túıindelmek. Munda qazaq-qyrǵyz jyrshylary «Manas» jyryn jatqa aıtýdan jarysqa túspek.
