Daýys berý qorytyndysy boıynsha, máslıhat depýtattary Prezıdent usynǵan kandıdatýrany biraýyzdan qoldady. Qyzylorda oblysynyń aktıvimen kezdesýde Úkimet basshysy Q. Kósherbaevqa óńirdi damytý boıynsha atqarǵan eleýli jumysy úshin alǵys aıtyp, jańa laýazymy – Qazaqstan Prezıdenti Ákimshiliginiń basshysy qyzmetinde sáttilik tiledi.
- Qyrymbek Kósherbaev Qyzylorda oblysyn 6 jyl boıy basqardy, óńirdiń áleýmettik-ekonomıkalyq damýyna úlken úlesin qosty. Osy ýaqyt ishinde iri ınfraqurylymdyq jáne ónerkásiptik jobalar iske asyryldy. Áleýmettik salany damytý boıynsha tıimdi sharalar qabyldandy, — dedi A. Mamın.
Qyzylorda oblysynyń aktıvine óńirdiń jańa ákimin tanystyra otyryp, Asqar Mamın Qýanyshbek Ysqaqovtyń óńirlik jáne ortalyq deńgeıdegi eleýli jumys tájirıbesin atap ótti: 2015 jyldan bastap Qyzylorda oblysy ákiminiń orynbasary laýazymyn atqardy, uzaq jyldar boıy QR Qarjy mınıstrliginiń júıesinde jumys istedi.
Premer-Mınıstr Asqar Mamın Qyzylorda oblysynyń aldynda Tuńǵysh Prezıdent - Elbasy Nursultan Nazarbaevtyń halyqtyń turmys sapasyn arttyrý jáne Memleket basshysy Qasym-Jomart Toqaevtyń qolda bar áleýetti iske asyrý arqyly turaqty ekonomıkalyq ósimdi qamtamasyz etý boıynsha mindetter turǵanyn atap ótti. Jańa ákimge óńir aktıvimen jáne máslıhat depýtattarymen birlesip, alǵa qoıylǵan maqsattarǵa qol jetkizý úshin barlyq kúsh-jigerdi jumyldyrý tapsyryldy.
