Maqsatty granttar bólý boıynsha
JOO-larda oqý úshin kóp balaly otbasylar men ataýly áleýmettik kómekti alatyn otbasylardan shyqqan balalar úshin qosymsha 5 myń maqsatty grant bólinedi. Granttar transferttermen jergilikti atqarýshy organdarǵa beriledi. Ákimdikter óńir qajettilikterin eskerýmen daıarlaý baǵyttarynyń tizimin aıqyndaıdy.
Respýblıkalyq mańyzy bar oblystardyń, qalalardyń jáne elordanyń ákimderi konkýrstyq komıssııa qurady. Konkýrsqa qatysýdyń mindetti sharty - UBT-nyń shekti ballyn jınaý.
«Aldymen 53 785 negizgi grantqa respýblıkalyq konkýrs ótkiziledi. Kóp balaly otbasylar men ataýly áleýmettik kómekti alatyn otbasylardan shyqqan, negizgi konkýrs nátıjeleri boıynsha grantqa ıe bolmaǵan abıtýrıentter qosymsha maqsatty granttar boıynsha konkýrsqa qatysý úshin jergilikti atqarýshy organdarǵa ótinish bere alady», — dedi A. Aımaǵambetov.
Qosymsha granttar boıynsha konkýrsqa ótinishter qabyldaý 5 jáne 10 tamyz aralyǵynda júrgiziledi. Granttar 25 tamyzǵa deıin taǵaıyndalady. Grant ıegerleriniń tizimin ákimdikter jergilikti buqaralyq aqparat quraldarynda jarııalaıdy.
Barlyq grant ıegerlerine 20 949 teńge kóleminde shákirtaqy taǵaıyndalady, sondaı-aq kanıkýl kezinde jylyna 2 ret jol júrý úshin (4 AEK) ótemaqy men jataqhanada oryn alý úshin birinshi rettegi kezek beriledi.
Jumysshy biliktilikteri boıynsha oqıtyn stýdentterdiń shákirtaqysyn arttyrý boıynsha
2017 jyldan beri «Barshaǵa arnalǵan tegin TjKB» jobasy iske asyrylýda. Kolledjderde jumysshy biliktilikteri boıynsha 122 myń adam oqıdy. Áleýmettik kepildik túrinde bir rettik ystyq tamaq (kúnine 350 teńge), kanıkýl kezinde jylyna 2 ret jol júrý úshin 4 AEK (10 100 teńge) kóleminde ótemaqy jáne 16 759 kóleminde shákirtaqy qarastyrylǵan.
Jumysshy biliktilikteri boıynsha oqıtyn stýdentterdiń 70%-y áleýmettik sezimtal turǵyndar sanatynan. Jalpy, stýdentterdi qoldaý úshin Memleket basshysy shákirtaqy kólemin 30%-ǵa kóterýdi tapsyrdy. Osylaısha, jańa oqý jylynda shákirtaqy kólemi 21 787 quraıtyn bolady.
Talantty balalar men jasóspirimderdi izdeý, olardy oqytý jáne JOO-larǵa túsýge daıyndaý boıynsha
Qazirgi kezde «Qazaqstannyń daryndy balalary» derekter bazasy qurylǵan, onda 26,5 myń oqýshynyń - respýblıkalyq jáne halyqaralyq olımpıadalar men ǵylymı jobalar konkýrstarynyń jeńimpazdary men júldegerleri týraly málimetteri bar.
Talanttardy anyqtaý jáne aýyldar men shaǵyn qalalardan shyqqan balalardy qamtýdy keńeıtý maqsatynda QR BǴM QR Tuńǵysh Prezıdenti Qorymen daryndy balalardy qoldaýdyń jańa Tujyrymdamasyn ázirledi. Aýyl jáne shaǵyn qalalardyń mektepterinen shyqqan balalarǵa erekshe kóńil bólinetin bolady. Irikteý krıterıi teorııalyq bilimdi emes, logıkalyq oılaý men praktıkalyq daǵdylardy ıgerýin baǵalaý bolmaq.
«Mektepke jol» jalpy respýblıkalyq aksııasyn qoǵamdastyq pen demeýshilerdi tartý arqyly keńeıtý boıynsha
QR Bilim jáne ǵylym mınıstrligi bıyl «Mektepke jol» respýblıkalyq qaıyrymdylyq aksııasy boıynsha qosymsha sharalar qabyldaıtyn bolady, aksııa 2008 jyldan beri jyl saıyn elimizdiń barlyq óńirlerinde ótkizilip keledi.
«Bıyl aksııa bir aı erte, ıaǵnı 1 shildeden bastalady. Kómekke muqtaj balalardy barynsha qamtý maqsatynda jyljymaly pýnktter, sondaı-aq eriktilerdi tartýmen mobıldi toptar uıymdastyrylady», — dedi A. Aımaǵambetov.
