Basymdyq áleýmettik salaǵa berilip otyr
Kún tártibine saı «2019-2021 jyldarǵa arnalǵan respýblıkalyq bıýdjet týraly» Zańǵa ózgerister men tolyqtyrýlar engizý týraly» zań jobasy boıynsha alǵashqy bolyp Ulttyq ekonomıka mınıstri Rýslan Dálenov sóz aldy. Mınıstrdiń aıtýyna qaraǵanda, 2019 jylǵa arnalǵan eldiń áleýmettik-ekonomıkalyq damý boljamynyń kórsetkishteri burynǵy deńgeıinde saqtalǵan jáne ózgermeıdi. Al 2019 jylǵa boljamdy bazalyq talaptary boıynsha munaı baǵasy barreline 55 AQSh dollary, jyldyq ınflıasııanyń nysanaly dálizi 4-6 paıyz, ishki jalpy ónimniń ósýi 3,8 paıyz dep eseptelgen.
Premer-Mınıstrdiń birinshi orynbasary – Qarjy mınıstri Álıhan Smaıylov Memleket basshysynyń ózekti áleýmettik túıtkilderdi sheshý jónindegi tapsyrmasyn iske asyrýdy qarastyratyn másele ekenin atap ótti.
– Zań jobasy 2019 jylǵa arnalǵan eldiń áleýmettik-ekonomıkalyq damý boljamynyń kórsetkishterin saqtaýdy eskere otyryp qalyptastyryldy. Respýblıkalyq bıýdjettiń negizgi parametrleri ózgerissiz qalady. Prezıdenttiń tapsyrmalaryn iske asyrýdy qarjylyq qamtamasyz etý Tikeleı ınvestısııalar qoryn qurýǵa kózdelgen qarajattyń bir bóligin qaıta bólý esebinen júzege asyrylady, – dedi Á.Smaıylov.
Onyń aıtýynsha, bıýdjettiń shyǵys bóligin naqtylaý úsh baǵyt boıynsha júzege asyryldy. Birinshiden, halyqtyń tutynýshylyq nesıeleri boıynsha borysh júktemesin azaıtý eskerilgen. О́mirlik qıyn jaǵdaıda qalǵan azamattar sanatyna jatqyzylǵan árbir qaryz alýshy úshin tikeleı jáne ataýly qarjylyq kómek retinde memleket 300 myń teńgege deıingi jalpy mólsherde negizgi boryshty jáne ol boıynsha eseptelgen syıaqyny óteıdi. Osy maqsattarǵa joba 89,2 mlrd teńge somasynda shyǵystar qarastyrady. Ekinshi baǵyt jumyspen qamtý, az qamtylǵan, kóp balaly otbasylar men jastardy qoldaý boıynsha pármendi sharalardy keńeıtý jáne kúsheıtýdi kózdeıdi. Bul maqsattarǵa 138,6 mlrd teńge baǵyttalmaq.
– Úshinshi baǵyt boıynsha jobada Úkimet rezervin 72,2 mlrd teńgege ulǵaıtý usynylady. Atalǵan qarajattyń bir bóligi Arys qalasyndaǵy tótenshe jaǵdaıdyń saldaryn joıýǵa baǵyttalady. Budan basqa, 35,9 mlrd teńge qarajatty ishki qaıta bólý esebinen shuǵyl sheshýdi qajet etetin mindettemelerdi qarjylandyrý iske asyrylady, – dep atap ótti Á. Smaıylov.
Jalpy otyrysta depýtattardyń talqylaýlarynan keıin Májilis Tóraǵasy zań jobasy boıynsha pikir bildirdi.
– Elbasy Nursultan Ábishuly Nazarbaevtyń áleýmettik-strategııalyq bastamalaryn odan ári jalǵastyrý maqsatynda Memleket basshysy Qasym-Jomart Toqaev arnaıy tapsyrmalar júktegen bolatyn. Osyǵan baılanysty azamattarǵa jan-jaqty qoldaý kórsetý, áleýmettik jaǵdaıyn jaqsartý úshin naqty sharalar qolǵa alynýda. Sondyqtan osy úsh jyldyq bıýdjetke engizilgen ózgerister barlyq áleýmettik tapsyrmalardy jetkilikti qarajatpen qamtamasyz etýge zor yqpalyn tıgizedi, – dedi N.Nyǵmatýlın.
Májilis Tóraǵasy altynshy shaqyrylǵan Parlament Májilisiniń tórtinshi sessııasynyń osy sońǵy jalpy otyrysynda sessııa jumysyn qorytyndylady.
– Búgin biz tórtinshi sessııadaǵy Májilistiń sońǵy jalpy otyrysyn ótkizip otyrmyz. О́zderińiz bilesizder, bul sessııa Májilis tarıhyndaǵy mańyzdy kezeńderdiń biri boldy. Osyǵan oraı elimizge, halqymyzǵa qajetti kóptegen zań qabyldandy, kóptegen parlamenttik is-shara ótti. Olardyń barlyǵy eń aldymen Elbasynyń áleýmettik-ekonomıkalyq, strategııalyq mindetterin oryndaýǵa arnaldy. Sonymen birge Prezıdent Q.Toqaevtyń alǵa qoıǵan tapsyrmalaryn júzege asyrýǵa da baǵyttaldy. Bul depýtattyq korpýstyń Úkimetpen, tıisti memlekettik organdarmen jáne qoǵamdyq uıymdarmen birlese atqarǵan jumysynyń nátıjesi deýge bolady, – dedi N.Nyǵmatýlın.
