Juma kúni Almatydaǵy Balýan Sholaq atyndaǵy sport saraıynda ótetin boks keshin QAZAQ Promotions kompanııasy uıymdastyryp jatyr. Shoýdyń basty jekpe-jeginde jeńilistiń kermek dámin tatyp kórmegen otandasymyz Qanat Islam WBO Inter-Continental belbeýi úshin domınıkandyq Hýlıo de Hesýspen judyryq túıistiredi. Sondaı-aq osy jekpe-jek úshin arnaıy AQSh-tan kelgen birinshi orta salmaqtaǵy jerlesimiz Madııar Áshkeev NBA belbeýin estonııalyq boksshy Pavel Semenovpen sarapqa salady. Dál osyndaı belbeý úshin jeńil salmaqtaǵy Abylaıhan Qusaıynov armıan Garnık Arýtıýnıanmen judyryqtasady.
Sonymen qatar atalǵan boks keshinde asa aýyr salmaqtaǵy Rýslan Myrsataev, ekinshi orta salmaqtaǵy Arman Rysbek, orta salmaqta judyryqtasatyn Berikbaı Nurymbetov pen Saparbaı Aıdarov jáne jartylaı jeńil salmaqtaǵy Beksultan Raýshanov ózderiniń kezekti jekpe-jekterin ótkizse, asa aýyr salmaqtaǵy Nursultan Amanjolov pen birinshi jartylaı orta salmaqtaǵy Asqar Erýbek kásipqoı bokstaǵy debıýt jekpe-jeginde sharshy alańǵa shyǵady. Otandastarymyzdyń qarsylastary AQSh, Belarýs, Ýkraına, Reseı, Armenııa jáne Ázerbaıjannyń boksshylary bolmaq.
Al 6 shilde kúni Nur-Sultan qalasyndaǵy «Barys Arena» muz saraıynda ótetin kásipqoı boks keshin brıtanııalyq MTK Global, MTK Kazakhstan jáne amerıkalyq Top Rank promoýterlik kompanııalary uıymdastyrýda. Bul boks keshiniń basty jekpe-jegi jeńil salmaqtaǵy fransııalyq Nordın Ýbaalı men Fılıppın eliniń boksshysy Artýr Vıııanýeva arasynda ótedi. Otandasymyz Janqosh Turarov argentınalyq Maýro Maksımılıano Godoımen WBO Inter-Continental beldigin sarapqa salsa, taǵy bir jerlesimiz Vıktor Kotochıgov WBC International beldigi úshin meksıkalyq Haıro Lopespen kúsh synasady.
Budan bólek bes boksshymyz kezekti reıtıngtik jekpe-jekterin ótkizedi. Atap aıtar bolsaq, Álı Baloev, Sultan Zaýrbek, Abylaıhan Sherǵalıev, Nurtas Ájbenov jáne Abaı Tólesh boks keshiniń kórkin qyzdyryp, jankúıerlerge qyzyqty jekpe-jek syılamaq. Sondaı-aq atalǵan boks keshinde ırlandııalyq Devıd Olıver Djoıs pen aýǵanstandyq Hasıbýlla Ahmadı de sharshy alańǵa shyǵatyn bolady.
