Tarata aıtar bolsaq, atalǵan daý-damaı 20 maýsymda Parlamentaralyq pravoslavıe assambleıasynyń jalpy otyrysynda Reseı Memlekettik dýmasynyń depýtaty S.Gavrılovtiń Grýzııa parlamenti spıkeriniń ornyna otyryp alýynan bastalǵan-dy. Reseılik depýtattyń aıtýynsha, Grýzııa tarapy bul oryndy ózderi belgilep bergen. Áıtse de bul jaǵdaı grýzııalyq oppozısııa depýtattarynyń shamyna tıip, olar jınalys zalynan ketip qalǵan edi. Sondaı-aq Grýzııa halqy da osy jaıtqa qatysty narazylyq tanytyp, kóp uzamaı qalada mıtıngiler bastaldy. Mıtıngige shyqqandar úkimettiń otstavkaǵa ketýin talap etti. Narazylyqtar nátıjesinde 300-ge jýyq adam ustalyp, 240 adam zardap shekken.
Reseı depýtattary óz kezeginde Grýzııadan ákelinetin sharaptar men mıneraldy sýlar ımportyn, aqshalaı aýdarymdardy toqtatýdy usyndy. Grýzııa ulttyq valıýtasynyń baǵasy sońǵy kúnderi kúrt tómendedi. Bul Grýzııa tarıhyndaǵy eń tómen baǵam kórinedi. Degenmen, Grýzııa prezıdenti Salome Zýrabıshvılı reseılik áriptesterin beıbit kelisimge shaqyrdy. Onyń aıtýynsha, eki el arasyndaǵy túsinispeýshilikti grýzııalyq radıkaldy kúshter óz paıdalaryna asyrýǵa nıetti. «Kreml mundaı arandatýshylyqqa jaýap berse, olardyń jaman oılarynyń júzege asýyna múmkindik jasamaq. Turaqtylyqty saqtaýdyń bir joly – beıbit kelisim», dedi Salome Zýrabıshvılı.
Eki el arasyndaǵy shıelenis kóptegen salalarǵa keri áserin tıgizbeı qoımady. Reseılik jáne grýzııalyq ónerpazdar arasynda aldaǵy ýaqytqa belgilegen sharalaryn ótkizýden bas tartqandar boldy. Olardyń qatarynda «A-Stýdıo» toby da bar.
Grýzııanyń týrızm sektory da álsiredi. Statıstıkaǵa súıensek, 2018 jyly Grýzııaǵa kelgen demalýshylardyń 21 paıyzy – Reseı azamattary. Iаǵnı, bul árbir besinshi týrıstiń reseılik bolǵanyn kórsetedi. Ulttyq týrızm ákimshiliginiń basshysy Marıam Kvrıvıshvılı 2018 jyly Grýzııaǵa 1,4 mln Reseı azamatynyń kelgenin málimdedi. Bıylǵy alty aıda Reseıden 700 myń týrıst kelip úlgergen. Boljam boıynsha 2019 jyly 2,7 mln Reseı azamaty keledi dep josparlanǵan edi.
Reseı men Grýzııa arasyndaǵy shıelenistiń órshýin tejep turǵan taǵy bir másele – úlken taýar aınalymy. 2018 jyldyń nátıjesi boıynsha, Grýzııanyń Reseıge eksporty 1,35 mlrd AQSh dollaryna baǵalanǵan. Búginde Reseı Federasııasy – Grýzııanyń basty saýda seriktesteriniń biri. Sonymen birge Reseı gazy Armenııaǵa Grýzııa arqyly tasymaldanady.
Sońǵy jańalyqtardan belgili bolǵandaı, Reseı prezıdenti 8 shildeden bastap reseılik áýekompanııalarǵa Grýzııaǵa jolaýshylar tasymalyna tyıym salǵan bolatyn. Reseıdiń Grýzııaǵa baǵyttalǵan áýe qatynasyn toqtatýy birinshi ret emes. Eske sala ketsek, 2008 jyldyń 9 tamyzynda Ońtústik Osetııadaǵy qarýly qaqtyǵys nátıjesinde osyndaı jaǵdaı bolǵan-dy. Sonymen birge týrıstik agenttikterge Grýzııaǵa joldama satpaýǵa keńes berildi.
Reseı Memlekettik dýmasynyń Grýzııaǵa qarsy sanksııa jarııalaý týraly usynysyn memleket basshysy Vladımır Pýtın qabyldamady. Reseı prezıdenti mundaı antıreseılik naýqandy tarıhtan habary joq, eń sońynda Grýzııaǵa kesiri tıetin toptardyń uıymdastyryp jatqanyn aıtty. «Grýzııa halqyn syılaǵandyqtan sanksııalar jarııalanbaıdy», dedi V.Pýtın.
Qoryta aıtqanda, eki el arasyndaǵy áli de túıini sheshilmegen máseleler álem nazarynda tur. Saıasatkerlerdiń sheshimi eki eldiń ekonomıkasyna qalaı áser etetinin, qandaı bitimge kelerin ýaqyt kórsetedi.
