Memleket basshysynyń Úkimettiń keńeıtilgen otyrsynda bıýdjetti tıimdi ıgerý boıynsha aýqymdy tapsyrmalar bergenin eske salǵan Altaı Kólginov Astana LRT jobasy jaıly sóz qozǵady. «Memleket basshysy bıýdjettiń tıimdi ıgerilmeı jatqanyn synǵa aldy. Astana LRT jobasy da atalyp, onyń quny tym joǵary ekeni, ózin aqtaıtyny kúmándi ekeni aıtyldy. Qazir Úkimetpen birge qurylys qunyn ońtaılandyrý boıynsha jumys istep jatyrmyz.
«Astana» bankiniń LRT qurylysy boıynsha buǵattalǵan barlyq qarajaty memleketke qaıtarylýy tıis», - degen qala ákimi aldaǵy ýaqytta bıýdjettik baǵdarlamalardyń qaıta jasalatynyn jetkizdi.
«Imıdjdik jobalardan tartyný qajet bolady. Prezıdent bul turǵyda aıqyn maqsat qoıdy. Bıýdjettik jobalar «Ne úshin qajet» jáne «Áleýmettik-ekonomıkalyq tıimdiligi qandaı» degen eń qarapaıym eki saýalǵa jaýap berý tıis ekenin atap ótti. Rasymen de jobany daıyndaǵanda tehnıkalyq-ekonomıkalyq qujattama men jobalyq smetasynan buryn qandaı áleýmettik-ekonomıkalyq máseleni sheshetinine bas aýyrtý qajet», - dedi Altaı Kólginov.
