Aıtys óneriniń Aq Jaıyq óńirindegi joqshysyna aınalǵan aqyn Baýyrjan Halıolla uıymdastyrǵan bul doda kópshiliktiń kóńilinen shyqty. Amfıteatrdyń 1200 oryndyq aýmaǵynda ıne shanshar jer bolmady. Aıtysqa arnaıy qonaq retinde shaqyrylǵan Qazaqstan Respýblıkasynyń eńbek sińirgen qaıratkeri, M.Maqataev atyndaǵy syılyqtyń eki dúrkin laýreaty, aqyn Júrsin Erman Oralda ótken sharanyń baǵasyn «Men búgin aıtystyń bıigine kóterildim» degen sózben berdi.
Bul aıtystyń ereksheligi – aqyndar ashyq aspan astynda emin-erkin aıtysty. Áýeli «Altyn dombyra» báıgesin eki márte jeńip alǵan ataqty Muhtar Nııazov pen oraldyq júırik Talǵat Myqı alqaǵa shyqty. Ekinshi jupta atyraýlyq Shalqarbaı Izbasarov Jaıyqtyń Jansaıasyna qarsylas boldy. Qazylar qadaǵalamaǵan, ýaqytpen shektelmegen sóz saıysy halyqtyń kóńilinen shyqty. Shynynda da bul aıtyssúıer kórermen úshin jasalǵan tamasha shoý-baǵdarlama boldy.
Shara sońynda Batys Qazaqstan oblystyq mádenıet basqarmasynyń basshysy Qadyrbolat Musaǵalıev kórermendi jyr merekesimen quttyqtap, kesh qonaǵy Júrsin Ermannyń ıyǵyna shapan japty.
Al tapqyr oı, shymyr shýmaǵymen eldi rıza qylǵan tórt aqynǵa da alǵys hat pen syılyq tapsyryldy.
Aq Jaıyq óńirinde bıyl alaman aıtys dúbiri jıi estileıin dep tur. Júrsin Erman «Altyn dombyra» saıysynyń bıylǵy dodasy VII «Altyn dombyra» respýblıkalyq aqyndar aıtysynyń bas júldegeri Jansaıa Mýsınanyń qurmetine onyń týǵan jeri – Oralda ótetinin habarlady.
«Sońǵy kezde ulttyq ónerge jany ashıtyn, bolmysy qazaq kásipkerler kóbeıip keledi. Bul óte qýanyshty jaǵdaı. Sebebi, bıýdjettiń búıregine qol salyp, memleketke alaqan jaıa bergenshe, tapqan jemin quzǵyndaı basa bermeı, suńqar qusap shashyp jep, eldiń batasyn alyp, yqylasyna bólengenge ne jetsin?! Men de óz kezegimde osyndaı azamattarǵa qolqa salyp, qaltasy qalyń jerlesterime úlgi bolsyn dep, Oralǵa da qonaqqa kelińder dep olarǵa ótinish aıtyp júremin. Ol eńbegim nátıjesiz emes» degen edi Baýyrjan Halıolla. Endeshe Aq Jaıyq óńirinde bıyl joǵary deńgeıdegi aıtys kóbeıgeli tur.
Batys Qazaqstan
