«QazAgro» AQ-tyń júrgizip otyrǵan jumysy

Sársenbi, 12 maýsym 2013 2:02

Kóshpeli otyrysta kóp nársege kóz jetkizildi

«Nur Otan» halyqtyq-demo­kratııalyq partııasynyń janyndaǵy Sybaılas jemqorlyqpen kúres jónindegi respýblıkalyq qoǵam­dyq keńestiń bul jolǵy otyrysy ádettegiden ózgesheleý jaǵ­daıda ótti.

Sársenbi, 12 maýsym 2013 2:02

Kóshpeli otyrysta kóp nársege kóz jetkizildi

«Nur Otan» halyqtyq-demo­kratııalyq partııasynyń janyndaǵy Sybaılas jemqorlyqpen kúres jónindegi respýblıkalyq qoǵam­dyq keńestiń bul jolǵy otyrysy ádettegiden ózgesheleý jaǵ­daıda ótti.

Onyń mánisi mynada edi. Mal sharýashylyǵyn damytý baǵdarlamasynyń iske asyrylýyna monıtorıng júrgizetin saraptaý tobyna kiretin Qazaqstan Respýblıkasy Parlamenti Máji­lisiniń depýtattary kóshpeli oty­rystaryn ózgeshe turpatta uıymdastyrdy. Olar bul úshin «QazAgro» ulttyq holdıngi jelisi boıynsha júzege asyrylatyn mal sharýashylyǵy jobalarynyń birine jolaýshylap atbasyn tiredi. Salanyń keleshegi men keleli máselelerin talqylaý Aqmola oblysynyń Eńbekshilder aýdanynda ornalasqan «KazBeef ltd» JShS reprodýktor-sharýashylyǵynda júrgizildi. Bul nysanǵa barý barysynda «Qazaqstan Respýblıkasynda mal sharýashylyǵyn damytýdyń ózekti máseleleri men keleshegi» taqyryby boıynsha alda bolatyn parlamenttik tyńdaýǵa usynylatyn oı-pikirler pysyqtaldy.
Parlament Májilisiniń depýtaty Tólegen Ibraevtyń je­tek­shiligindegi saraptaý toby sha­rýa­shylyqtyń aǵymdaǵy jaǵ­daıymen, reprodýktordyń ınfra­qurylymymen jete tanysty. Jaıylymdyq jerlerdiń jaı-kúıine qanyǵyp, sýmen jabdyqtaý, tehnıkalyq jáne tehnologııalyq bazalardyń jumysyna jiti nazar aýdardy.
«KazBeef ltd» JShS asyl tuqymdy sharýashylyǵyn qurý – Qazaqstandaǵy qazirgi iske asyrylyp jatqan iri qara mal etiniń eksporttyq áleýetin damy­­tý jónindegi memlekettik baǵdarlama sheńberindegi alǵashqy tájirıbelerdiń biri bolyp tabylady. 2010 jyly ulttyq holdıng respýblıkada asyl tuqymdy sharýashylyqtardyń (reprodýktorlardyń) jelisin qurýdy boljaıtyn ınvestısııalyq baǵytty bekitkennen keıin «QazAgroО́nim» AQ arqyly Soltús­tik Dakota (AQSh) shtatynan angýs jáne gereford tuqymdy 1327 sıyr men 20 buqa satyp aldy.
Qazirgi tańda «KazBeef ltd» JShS-da jalpy iri qara tabynynyń sany bordaqylaý alańyndaǵy maldy qosqanda shamamen 9 myń bas quraıdy, onyń ishindegi 3 myń 500 basy analyq mal.
Búginde asyl tuqymdy maldar jaıylymǵa shyqty, áli de buzaýlap jatyr. Bekitilgen jáne jalǵa alynǵan aýmaqtardy qosa eseptegende jaıylymnyń jalpy alańy shamamen 140 myń gektarǵa jetedi. Munda 4 jelsorǵysh júıesi ornalastyrylyp, 32 sýarý orny salynǵan. Sonymen qatar, 36 shaqyrymdyq sý qubyry tartylǵan. Sharýashylyq bolashaqta asyl tuqymdy mal basyn 10 myńǵa deıin, sonyń ishinde analyq maldy 5 myńǵa deıin kóbeıtýdi josparlaý­da. Nátıjesinde byltyr 660-tan astam buqa ózge sharýashylyqtarǵa satylypty. Tańdaýly angýs jáne gereford tuqymdary Qaraǵandy, Pavlodar, Shyǵys Qazaqstan jáne Aqtóbe oblystarynyń sharýa qojalyqtaryna jóneltilipti.
«KazBeef ltd» JShS atqarýshy dırektory Beıbit Erýbaevtyń pikirinshe, aldaǵy ýaqytta sharýashylyq jemshóp bazasyn barynsha nyǵaıtýdy qolǵa alady. Sóıtip, jaqsy jetildirilgen reprodýktorǵa ıe bola otyryp, bordaqylaý alańynan bastap etti óńdeýge jáne ony odan ári eksporttaýǵa deıingi zamanaýı júıesi bar tikeleı yqpaldasqan kompanııaǵa aınalý mindeti tur. «Qazir biz jańa ónim – mármár etin óndirýdi oılastyrýdamyz. Mundaı etti Qazaqstannyń jáne Reseıdiń, Qytaıdyń, Taıaý Shyǵys pen Ońtústik-Shyǵys Azııa elderine eksporttaýymyz qajet. Bul bizdiń aldymyzda turǵan zor mindet. Taıaýdaǵy 5-7 jyl ishinde birtalaı jetistikterge qol jetkizemiz degen josparymyz bar» deıdi Beıbit Erýbaev.
Saraptaý tobynyń ókilderi sharýashylyqtyń júrgizip otyrǵan jumysyna oń baǵa berdi. Maldy kútip baǵýdan jáne tehnıkalyq jaraqtandyrýdan bastap tıimdi menedjment pen túlikti ósirýdegi ozyq ádisterge deıingi ınnovasııalyq tehnologııalardy qoldaný tásili erekshe atalyp ótildi. Alaıda, Parlament depýtattarynyń paıymdaýlary boıynsha, jemshóp óndirisi men veterınarııalyq qyzmet kórsetý máselelerine áli de bolsa kóp kóńil bólý kerek tárizdi. Sarapshylar jalpy elimizde mal sharýashylyǵy baǵdarlamasyn iske asyrýǵa keshendi sheshim qajettiligin taǵy bir márte eskertti.
«Nur Otan» HDP janyndaǵy Sybaılas jemqorlyqpen kúres jónindegi respýblıkalyq qoǵamdyq keńestiń mal sharýashylyǵyn damytý baǵdarlamasynyń iske asyrylýyna monıtorıng júrgizý jónindegi saraptaý tobynyń tóraǵasy, Parlament Májilisiniń depýtaty Tólegen Ibraev bylaı deıdi: «2010 jylǵy kezeńmen salystyrǵanda, qazirgi tańdaǵy aıyrmashylyq jer men kókteı. Halyq júzege asyrylyp jatqan bul jobaǵa shyn máninde zor mán beredi. Degenmen, bári de júzege asyryldy deý árıne, erterek. Bizde áli de bolsa biraz ter tógetin máseleler men nárseler jetkilikti. Birinshiden, maldy azyqtandyrý jáne berik jemshóp qoryn qurýymyz kezek kúttirmeıdi. Ekinshiden, veterınarııalyq qaýipsizdikti damytýymyz kerek. Sonda ǵana jetistikterge jetetinimiz sózsiz.
О́z kezeginde, jobany qar­jylandyrýshy kompa­nııa – «QazAgroО́nim» AQ basqar­masy­nyń tóraǵasy Aleksandr Solıýlev elimizdegi mal sharýashy­lyǵynyń joǵary áleýeti týraly pikirin aıtty. Ol osy rette respýblıkanyń eksportqa baǵdarlanǵan mal sharýashylyǵy ónimderin ótkizýden astyq sektorymen salystyrǵandaǵy kólemde, tipti odan da kóp valıýtalyq túsim alýǵa bolatyndyǵyn atap ótti. «QazAgro» holdıngine qarasty enshiles kompanııanyń basshysy jańa tehnologııalardy óndiriske batyl engizýge shaqyrdy.
Kóshpeli otyrystyń qory­tyndysynda biraz túıtkildi máse­lelerdiń túıini tarqatylyp, aldaǵy isteletin jumystyń nobaıy da anyqtalǵan tárizdi. Onyń sharýashylyqqa tıgizer paıdasy da mol bolmaq.
2011-2012 jyldary respýblıkada jalpy qýaty 35,2 myń bordaqylaý orny bar alańdar salyndy. Onyń ishinde «QazAgro» ulttyq holdıngi qarajaty esebinen 17,7 myń bordaqylaý orny ashyldy. Osy kezeńde reprodýktorlar qurý sheńberinde respýblıkaǵa 30 myń asyl tuqymdy iri qara maly ákelindi. 22,7 myń sıyr «QazAgro» holdınginiń qarajaty esebinen satyp alyndy.
Jalpy «QazAgro» ulttyq holdıngi kompanııasy tobynyń qarjylandyrýymen fermerlik sharýashylyqtardy damytý baǵ­darlamasy aıasynda 2011-2012 jyldar aralyǵynda aýyl tur­ǵyndary 115 myń iri qara malyn jáne 4,5 myń asyl tuqymdy buqa aldy. 2013 jyly holdıngtiń qoldaýymen sharýashylyqtar 20,3 myń sıyrmen jáne 1167 asyl tuqymdy buqamen qoralaryn toltyrdy.
«QazAgro» ulttyq basqarýshy holdıngi» AQ agroónerkásiptik keshen salasynda qyzmetin júze­ge asyratyn aksıonerlik qoǵamdardy tıimdi basqarý úshin 2006 jyly qurylǵan bolatyn. Holdıngtiń quramyna «Azyq-túlik kelisim-shart korporasııasy» UK» AQ, «QazAgroО́nim» AQ, «QazAgroQarjy» AQ, «Agrarlyq nesıe korporasııasy» AQ, «Aýyl sharýashylyǵyn qarjylaı qoldaý qory» AQ, «QazAgroKepil» AQ, «QazAgroMarketıng» AQ kiredi.

Marat AQQUL,
«Egemen Qazaqstan».