Jańaqorǵan aýdany boıynsha 2987 otbasy, 17176 adamǵa aqshalaı kómek túrindegi memlekettik ataýly áleýmettik kómek taǵaıyndalǵanyn atap ótken jón. Sonymen qatar, aýdan boıynsha 268 otbasyǵa azyq-túlikteı kómek berilgen.
Aldymen, aımaq basshysy kópbalaly ana J.Muzafarovanyń úıine baryp, otbasynyń tynys-tirshiligimen tanysty. О́z kezeginde, kópbalaly ana memlekettiń qamqorlyǵyna zor rızashylyǵyn jetkizdi.
Sondaı-aq, Qýanyshbek Dosmaıyluly aýyl turǵyndarynyń qoldaýymen, eriktiler tobynyń bastamasymen kóp balaly januıaǵa arnalǵan jeke turǵyn úıdiń qurylysyn bastaý rásimine qatysty.
«Jańarǵan Jańaqorǵan Jastary» eriktiler toby Elbasy bekitken «Jastar jyly» aıasynda 2019 jyldyń 20 naýryzynda Jańaqorǵan aýdanynda ortalyq meshit, «Qým sahaba», «Hısamıddın Syǵanaqı» meshiti janynan qurylǵan.
Aıta keteıik, «Jańarǵan Jańaqorǵan Jastary» eriktiler toby qoǵamdaǵy áleýmettik jaǵynan az qamtylǵan jáne turmysy tómen otbasylardyń eńsesin tiktep, baspanaly bolýyna uıytqy bolyp júr. Olar asar ádisi arqyly dástúrdi dáripteı otyryp, joq-jitikke pana bolýdy maqsat tutyp, sharasyz kúı keshken shańyraqqa demeý bolyp keledi. Atap aıtsaq, ótken jyly aýdan turǵyny A.Isametovaǵa 4 bólmeli baspana salyp bergen, bıyl 2019 jyldyń 5 maýsym kúni jalǵyzbasty ana A.Belasarovaǵa 4 bólmeli turǵyn úı turǵyzyp berdi.
Erikti jastardyń negizgi maqsaty – «Memleket maǵan ne beredi?» degen masyldyq psıhologııadan arylyp, «Men elim úshin ne jasaı alamyn?» degen ustanymmen aýdannyń ósip-órkendeýine úles qosý.
Jastardyń ıgi bastamasyna aımaq basshysy da qoldaý bildirip, oń baǵasyn berdi.
