Jalpy Tax free júıesi Almatydaǵy sheteldik týrıster sanyn jylyna 25 myńǵa ulǵaıtýǵa sep bolmaq. Olar óz kezeginde brendtik taýar úshin 1 myńnan 10 myń dollarǵa deıin qarjy jumsaıdy dep kútilýde. Saýda-sattyqtan bólek, týrıster aldymen Qazaqstanǵa saparlatý úshin jol-puly men turatyn orynǵa, sondaı-aq ózge de týrısttik qyzmetterge qosymsha qarajat quıatyny belgili.
Qanatqaqty joba oń nátıje bergen jaǵdaıda Tax free júıesi Qazaqstannyń ózge de óńirlerinde iske qosylady. Osylaısha, Qazaqstandy Ortalyq Azııadaǵy shoppıng-týrızmniń ortalyǵyna aınaldyrý kózdelip otyr. Sheteldik týroperatorlar salyq sommasyn qaıtarýdyń júıesi engizilmegen elderge týrısttik baǵyttardy jasamaıtyny anyq. Sondyqtan, Qazaqstan bul múmkindikti tıimdi qoldanýǵa múddeli.
Salyqty qaıtarý júıesi týrızm damyǵan memleketterde jaqsy jolǵa qoıylǵan. Statıstıkalyq málimetterge súıensek, Tax free júıesin engizgennen keıin týrıster aǵylyp kelip, saýda aınalymyn eselep arttyrýǵa septigin tıgizdi. Júıeni iske qosý arqyly Qazaqstanǵa jylyna 300 myń týrıst tartý josparlanýda. Odan túsetin paıdany 2025 jylǵa deıingi 198 mlrd. jetkizý kózdelip otyr.
Esterińizge sala ketsek, týrızm salasyn damytýdyń 2019-2025 jyldarǵa arnalǵan memleketttik baǵdarlamanyń aıasynda Tax free júıesin áýelde 2022 jyldan keıin engizý kózdelgen edi. Alaıda «Kazakh Tourism» UK» AO janynan qurylǵan Jobalaý keńsesiniń tikeleı aralasýymen qanatqaqty joba belgilengen merzimnen buryn iske qosylatyn boldy.
