Alǵashqy kúni Zarına Dıas pen Elena Rybakınanyń óz qarsylastaryna ese jiberip, jarys jolynan shyǵyp qalǵany jaıynda biz buǵan deıin jazǵanbyz. Odan keıin taǵy úsh otandasymyz óner kórsetip, úsheýi de kelesi kezeńge ótti. Atap aıtsaq, Mıhaıl Kýkýshkın álemniń 10 raketkasy, ıspanııalyq Roberto Baýtısta Agýtpen aıqasty. Bes settik saıys 3:6, 6:1, 6:4, 3:6, 6:3 esebimen bizdiń jigittiń paıdasyna sheshildi. Endi Kýkýshkın avstralııalyq Alekseı Popyrınmen kezdesedi.
Aleksandr Býblık kolýmbııalyq Santıago Hıraldodan basym tústi – 2:6, 6:0, 7:5, 3:6, 6:4. Bir ǵajaby, osy básekelerdiń ekeýi de 3 saǵat 18 mınýtqa sozyldy. Onyń endigi qarsylasy – ıtalııalyq Tomas Fabbıano.
Áıelder arasyndaǵy Qazaqstannyń birinshi raketkasy Iýlııa Pýtınsevaǵa amerıkalyq Medıson Brengldi utý esh qıyndyq týǵyzǵan joq. Bul kezdesýde 6:3, 6:3 esebi tirkeldi. Kelesi kezeńde jerlesimiz belarýssııalyq Arına Sobolenkomen saıysqa túsedi.
