Sýret: inbusiness.kz
Spektaklde kórkemdik jáne mýzykalyq sheshimder jańartylyp, klassıkalyq túpnusqasynyń mazmuny saqtalǵan. Urpaqtar sabaqtastyǵy jalǵasyp, dástúr men zamanaýı oı da toǵysady.
Jańa qoıylym Abaıdyń ishki jan dúnıesin, onyń adamgershilik tańdaýy men óz dáýirimen rýhanı qaıshylyǵyn tereńirek ashýǵa baǵyttaldy. Qoıylymnyń ssenografııasy men vızýaldyq sheshimderinde aıtarlyqtaı ózgerister jasalǵan. Qoıylym sýretshisi Esengeldi Tuıaqov sahnalyq keńistikti dalanyń jınaqtalǵan beınesi retinde qalyptastyrdy. Raýan Qaırýllaeva jasaǵan sahnalyq obrazdar tarıhı formalar men ulttyq naqyshtarǵa negizdelip, zamanaýı kórkemdik turǵyda qaıta paıymdaldy.
Al operanyń mýzykalyq partıtýrasy ózgermegen. Qoıylymnyń bas dırıjeri Nurjan Baıbosynovtyń basqarýymen orkestr, hor jáne solıster partıtýranyń aýqymyn aıshyqtap, tutas ári úılesimdi mýzyka usynady. Qoıylym rejısseri Farhat Moldaǵalı jańa nusqada urpaqtar sabaqtastyǵy taqyryby aıryqsha kóterilgenin atap ótti.
Shyǵarmada kásibı opera óneriniń baı formalary – arııalar, rechıtatıvter, ansamblder keńinen qoldanylǵan.
