Elimizdiń eń úzdik tennısshisi alǵashqy aınalymdarda Kaıa Iývan (Slovenııa), Varvara Gracheva (Fransııa), Tereza Valentovanyń (Chehııa) tas-talqanyn shyǵardy. Odan keıin Elıze Mertensti de op-ońaı eńserdi. Shırek fınalda joly álemniń ekinshi raketkasy Iga Shventekpen qıysty. 24 jastaǵy Varshavanyń týmasy sporttyń bul túrinde kóptegen belesti baǵyndyrdy. «Rolan Garrosta» (Fransııanyń ashyq birinshiligi) tórt márte teńdessiz dep tanylsa, US Open (AQSh) men Ýımbldonda (Ulybrıtanııa) bir-bir retten top jardy. WTA-nyń 25 týrnırinde bas júldeni oljalady. Osy joly ekeýi oıynynyń birinshi setinde biraz tireskenimen, ekinshisinde Elena qarsylasyna bas kótertpedi – 7:5, 6:1.
Jartylaı fınalǵa jerlesimiz amerıkalyq Djessıka Pegýlamen kezdesti. 31 jastaǵy AQSh tennısshisiniń eń zor tabysy – 2024 jyly US Open dodasynyń fınalynda óner kórsetti. WTA týrnırlerinde toǵyz ret top jardy. Kezinde álemniń úshinshi raketkasy dárejesine jetken Djessıka qazir úzdikter tiziminde altynshy orynda tur. Biraq Elenany eńserýge onyń da áleýeti jetpedi – 6:3, 7:6.
Bas júlde úshin tartys Elena Rybakına Arına Sobolenko arasynda ótti. Búginde tórtkúl dúnıeniń teńdessizi atanyp otyrǵan Belarýs eliniń betkeustary US Open men Melbýrndegi týrnırlerdiń eki dúrkin jeńimpazy atanyp, Rolan Garrostyń fınalyna shyqty. «Úlken dýlyǵanyń» juptyq saıystarynda da mereıi ústem boldy. WTA-nyń 22 dúrkin jeńimpazy degen ataǵy taǵy bar. Dál osy sportshy osydan úsh jyl buryn «Australian Open» dodasynyń sheshýshi synynda bizdiń oıynshydan basym túsip, bas júldeden aıyrǵan edi.
Jalpy, qos myqtynyń túrli jarystarda joldary jıi qıysyp júr. Byltyr jyl aıaǵynda Saýd Arabııasynda uıymdastyrylǵan WTA-nyń qorytyndy týrnırinde Rybakına Sobolenkoǵa san soqtyrdy. Taı-breıkte otandasymyz oǵan bir upaı da ustatpady. Endi mine, bitispes qarsylastar «Australian Open-2026» týrnıriniń fınalynda jolyqty. Alǵashqy eki sette ekeýi ıtjyǵys tústi – 6:4, 4:6. Úshinshisinde Sobolenko 3:0 esebimen alda kele jatty. Soǵan qaramastan, búkil erik-jigerin boıyna jıǵan jerlesimiz qatarynan bes geımdi utyp, tarazy basyn ózine aýdardy. Nátıjesinde, álemniń birinshi raketkasyn taǵy da tize búktirdi – 6:4. Sóıtip, Elena Rybakına «Úlken dýlyǵa» dodalarynda ekinshi márte dara shyqty. 2022 jyly Ýımbldonda bas júldeni oljalaǵan edi. Osy jeńisiniń arqasynda Elena Dafna Akherst kýbogimen qosa, 2,8 mıllıon dollar kóleminde syıaqy aldy. Sondaı-aq álemdik reıtıngte úshinshi orynǵa kóterildi.
Serbııalyq Aleksandra Krýnıchpen juptasyp óner kórsetken Anna Danılınanyń da qarqyny qýantty. Bastapqy básekelerde barlyq qarsylasynan basym túsken olar shırek fınalda álemdik reıtıngte kósh bastap turǵan chehııalyq Katerına Sınıakova men amerıkalyq Teılor Taýnsendti 6:2, 3:6, 6:0 esebimen utty. Jartylaı fınalda kanadalyq Gabrıela Dobrovskı men brazılııalyq Lýıza Stefanıge san soqtyrdy – 7:6, 3:6, 6:4. Osylaısha, Anna «Úlken dýlyǵa» týrnırlerinde úshinshi ret bas júldege talasý múmkindigine ıe boldy. 2022 jyly osy Melbýrnde, ótken jyly Rolan Garrostyń fınalynda oınaǵan edi. Biraq bul joly da sheshýshi básekede Danılına men Krýnıch juby belgııalyq Elıse Mertens pen qytaılyq Chjan Shýaıdy jeńe almady – 6:7, 4:6.
Jastar arasyndaǵy jarysta Zańǵar Nurlanuly el tennısiniń tarıhynda qalatyndaı is tyndyrdy. Bastapqyda Pantaratorn Kýnanan (Taıland), Taıkı Takızava (Aýstralııa), Savva Rybkındi (Reseı) qapy qaldyrǵan ol ¼ fınalda Kaı Tompsondy (Gonkong) 3:6, 7:6, 6:4 esebimen tize búktirdi. Jartylaı fınalda Zańǵar amerıkalyq Kıton Hansqa ese jiberdi – 3:6, 4:6. Desek te osy mejege jetýiniń ózi 17 jastaǵy qandasymyzdyń eleýli tabysy. Byltyr Nurlanuly US Open dodasynda da dál osyndaı nátıje kórsetti.
Erler arasyndaǵy jarystyń fınalynda ıspanııalyq Karlos Alkaras pen serbııalyq Novak Djokovıch kezdesti. Alǵashqysy nebári 22 jasta, ekinshisiniń jasy 38-de. Kezinde qarsy kelgenderdiń barlyǵyn bet qaratpaı utyp, talaı rekordtyq kórsetkishke qol jetkizgen Novak keıingi jyldary óz pozısııasyn joǵalta bastaǵany anyq. Karlostyń, kerisinshe, qarqyny jyldan jylǵa kúsheıip keledi. Saqa sportshy men jas jolbarystyń ózara básekesi Pıreneı túbegi ókiliniń jeńisimen aıaqtaldy – 2:6, 6:2, 6:3, 7:5. Sóıtip, Alkaras «Úlken dýlyǵa» sanatyndaǵy jarystardaǵy jeńister sanyn jetige jetkizdi. Buǵan deıin US Open, Ýımbldon, Rolan Garrosty eki retten utqan Ispanııanyń maqtanyshy óz mansabynda Melbýrndegi týrnırde tuńǵysh ret top jardy.
