Olga Sellerdiń zergerlik ónermen aınalysyp kele jatqanyna 10 jyldan asty. Qara altynmen zergerlik buıym jasap júrgenine jeti jyldyń aınalasy bolypty. Munysy altynqol sheberdiń aıtýynsha, shyǵarmashylyǵyn aıshyqtap turatyn kórinedi.
– Alǵashqy buıymdarym óte názik boldy, taǵýǵa jaramaıtyn, tez synyp ketetin. Onyń ústine túsi kıimge juǵyp, bylǵaıtyn. Keıin tájirıbe arqyly turaqtandyrý tásilin meńgerdim. Qazir áshekeılerim qaýipsiz ári berik. Bul materıalmen jumys isteý ońaı emes. Úgitilip turatyn kómirdi turaqtandyrýǵa eki apta ýaqyt ketedi. Arnaıy shaıyr arqyly óńdelgen qara tas berik bolyp, qolǵa da, kıimge de zııan keltirmeıdi. Kómirdiń ár túrin synap kórdim. Eń sapalysy – antrasıt. Negizi túrli materıaldarmen tájirıbe jasaǵandy unatamyn. Aǵash, teri, tipti epoksıdti shaıyrdy da qoldanamyn. Kómirdiń ishinde antrasıt eń berik túri. Degenmen ony tabý qıyn. Qazir kómir tasýshylardyń bári meni tanyp alǵan. Úıime kómir alsam mindetti túrde 1 shelek erekshe túrlerin jınap ákelip beredi, – deıdi zerger.
Olganyń birtalaı shákirti bar. Solardyń biri – Natalııa Starostına. Ol áýeli dızaınerdiń áleýmettik jelidegi jumystaryn baqylap, keıin áshekeı satyp alypty. Ýaqyt óte kele qyzyǵýshylyǵy artyp, sheberlik saǵatyna arnaıy qatysqan. Qazir ózi de túrli buıymdar jasap, satady.
– Olga – myqty dızaıner. Jumystary ózgeshe. Áshekeılerin taǵyp kórgennen keıin, sán áleminde ózimdi de baıqaǵym keldi. Qazir buıymdar jasap, sata bastadym. Kóbine gúldi buıymdar jasaǵandy unatamyn, – deıdi Natalııa Starostına.
Olganyń eńbegi birneshe otandyq baıqaýda joǵary baǵalanyp, túrli kórmeler men art-jármeńkelerge usynyldy. Byltyr qyrkúıek aıynda onyń brendi Mılan sán aptalyǵynda tanystyryldy. Dızaıner kórsetilimge kásibı modelderdi emes, óz qurbylaryn ertip barýdy jón kórgen. Osylaısha, podıýmda 14 áıel óner kórsetip, dızaınerdiń eńbegin elge tanystyrdy.
Aldaǵy ýaqytta dızaıner áshekeıler túrin kóbeıtip, otandyq dızaındy halyqaralyq deńgeıde nasıhattaýdy oılastyryp otyr.
Qaraǵandy oblysy
