Keıbir azamattar da zań talaptaryn tap-tuınaqtaı etip oryndaı bermeıdi. О́z isine nemketti, sharýasyna shalaǵaı. Ýaqyt ótkizip baryp ádildik qýmaq. Ondaılar kóp-aq. Tegin zań qyzmetin kórsetý búgingi kúngi kópshilik kókeıinde júrgen oıdy dóp basqandaı. Barlyq shara ómirdiń ózinen týyndaǵan jaılardy qamtyp otyr. «Negizgi Zań aptasy» jobasy aıasynda halyqqa tegin zań kómekterin kórsetý qolǵa alyndy.
Respýblıkalyq aksııa sheńberinde aýmaqtyq notarıaldyq palata notarıýsteri jáne oblystyq advokattar alqasy advokattarynyń qatysýymen oblys ortalyǵynda, sondaı-aq barlyq aýdandarda keń aýqymdy jumys júzege asyrylýda. Aldymen BAQ arqyly halyqty qulaqtandyryp, óz qyzmetteri jaıynda habardar etipti.
– Kádimgi qarapaıym tirshilikte áleýmettik nemese qarjylyq qıyn jaǵdaıǵa tap bolǵan azamattar advokattar nemese zań keńesshilerinen óziniń quqyqtyq jaǵdaıyn tolyq súıemeldeý úshin aqysyz kómek alý zańda kózdelgen, – deıdi oblystyq Ádilet departamenti basshysynyń mindetin atqarýshy Baqytjan О́mirzaqov, – al bul jolǵy is-sharalarymyz zań kómeginiń ashyqtyǵyn, ádildigin jáne sapasyn kóterý maqsatynda bolyp otyr.
Shynynda da zań kómegine zárý jandar az emes eken. Qylmystyq ister jónindegi mamandandyrylǵan aýdanaralyq zańdyq keńes berý ortalyǵynyń meńgerýshisi Asqar Aqparovtyń aıtýyna qaraǵanda, kómek surap keletinderdiń deni aldymen alıment óndirý, múlik quqyǵy, nesıe tóńireginde eken.
– Biz, advokattar Asqar Ámirjanov, Baqytjan Qusaıynov úsheýimiz oblystyq Nur Otan partııasy fılıalynyń ǵımaratynda qala turǵyndaryn qabyldap, keńes berdik, – deıdi Asqar Aqparov, – kóp jaıda áli de bolsa azamattardyń zań talaptaryn jetik meńgere qoımaǵandyqtary baıqalady. Ekinshi bir másele, qujattarǵa yjdahatty bolý jaıy. Negizi kelispeýshilik bolmaý úshin kez kelgen isti bastar aldynda óz sharýalaryna qatysty zań talaptaryn jan-jaqty túısinip, mamandardan keńes alyp baryp bastaý qajet ekendigin eskere bermeımiz. Eger barlyǵy zań aıasynda bolsa, qıyndyqqa tap bolmas edi. Qabyldaý ótkizgen kúni zań kómegine júgingender tolyqqandy keńes aldy.
Kelýshiler áli de az emes eken. Kómek suraı kelgen bir azamatpen jolyqtyq. Onyń máselesi muraǵa qalǵan páterdiń kimge tıesili bolatyndyǵy jóninde eken. Uzaqqa sozylǵan, ádil sheshimin tabý ońaıǵa túspeıtin shym-shytyryq is. Araaǵaıynnyń aqylymen sheshilmegen soń zańǵa júginbek.
Aksııa barysynda qanshama adam kópten beri qordalanyp qalǵan máseleleriniń mánisin anyqtap, bir arylyp qaldy.
Aqmola oblysy
