Sýretti túsirgen Erlan Omar, «EQ»
Kitap baǵa jetpes rýhanı qundylyǵymyz, asa zor mádenı baılyǵymyz ekeni jaıly nebir ulylar artyna ǵıbratty sózder qaldyrǵan. «Kitap–aqylyna aqy suramaıtyn asyl qazyna» (Álisher Naýaı), «Adamdar kitap oqýyn qoısa, oılaýyn da qoıady» (Denrı Dıdro), «Jaqsy kitap oqý – aqyldy adammen syrlasqanmen birdeı» (Lev Tolstoı). Hakim Abaı «artyq ǵylym kitapta, erinbe oqyp kórýge» dep bilimdilikke shaqyrsa, halqymyz «kitap – bilim bulaǵy» dep tobyqtaı sózben túıindegen. Budan shyǵatyn qorytyndy, ýaqyt qansha ózgerip, búgingideı ozyq tehnologııalar dáýirine jetsek te kitaptyń mán-mańyzy, oǵan degen yntyzarlyq, qumarlyq joıylmaq emes. Bul oraıda adamnyń ishki jan dúnıesin, oı-sanasyn ósirýge, ıntellektýaldyq tulǵasyn qalyptastyrýǵa tikeleı qyzmet etetin kitaphanalardyń áleýmettik-mádenı mekeme retindegi róli de, yqpaly da aıryqsha. Onyń aıqyn bir úlgisin oqyrmandardyń jıi bas suǵatyn súıikti ornyna aınalyp, kitap oqý mádenıeti arqyly ulttyq mádenı kodymyzdy jańǵyrtýǵa belsene atsalysyp kele jatqan Poltavka aýyldyq kitaphanasynyń tájirıbesinen anyq baıqaýǵa bolady.
– Búgingi oqyrman suranysyn qanaǵattandyrý ońaı emes. Bul talǵam úrdisinen kóriný úshin materıaldyq-tehnıkalyq jaǵynan jaqsy jabdyqtalyp qana qoımaı, rýhanı, estetıkalyq áser syılaıtyn, jas býynǵa qoǵamdy tanyp-bilýge, naqty ómirge qajetti baǵyt-baǵdar beretin, jón silteıtin tanymdyq is-sharalar júıeli uıymdastyrylýy shart. Sonda ǵana aqparattyq qoljetimdilikti qamtamasyz etýge, kitap oqý mádenıetin arttyrýǵa, ósken orta, týǵan jer týraly naqty parasat-paıym túsinigin qalyptastyrýǵa bolady, – dedi áńgimeleskenimizde óńirde tirek ortalyǵy sanalatyn mádenıet oshaǵynyń meńgerýshisi Valentına Pak.
Valentına Vıktorovnanyń aıtýynsha, «Poltavka» JShS-niń dırektory, isker basshy, «Qurmet» ordeniniń ıegeri Eltaı Zikirın kitaphanany jańa tıptik ǵımaratqa kóshirip, kópsalaly qondyrǵylar, kitap, kórme stellajdaryn, kompıýter, televızor, ınteraktıvti taqta, aýdıo-beıne apparatýra satyp ápergen. Sóıtip oblysta tuńǵysh ret modeldik mártebege ıe bolǵan. Eresekter men balalar tynyǵatyn arnaıy bólme bar. «Rýhanı jańǵyrý» baǵdarlamasy aıasynda ótken oblystyq baıqaýda júldeger atanyp, 200 myń teńge syıaqy jıhaz alýǵa jumsalypty. Byltyr «Rýhanı qazyna» atalymy boıynsha top jarypty. Márııash Sháripovanyń basqarýyndaǵy ortalyqtandyrylǵan kitaphanalar júıesiniń mamandary kásibı-ádistemelik jaǵynan járdemdesip, naqty kómekter berip turady. Osylaısha birlese is-áreket etýdiń arqasynda elimizde de jaqsy jaǵynan tanylyp, is-tájirıbesi taratylypty. Barlyq áleýmettik nysandar jumys isteıtin Poltavka oqyrmany kóp eldi mekender sanatynda. Kitap oqýdy ómirlik saltyna aınaldyrǵan turǵyndar oqý zalyna jıi kelip, kez kelgen aqparatpen tanysyp, qyzyqtyratyn máseleler tóńireginde oı-pikirler alysyp, tegin ınternet jelisin paıdalana alady. Búginde kitaphananyń jalpy qorynda alty myńǵa jýyq kitap saqtaýly. Qordyń úlken bóligi qazaq, shetel klassıkteriniń týyndylaryna arnalǵan. Ádistemelik-bıblıografııalyq kórsetkishter, ózge de kómekshi quraldar molynan kezdesedi. Jınaqtaý, esepke alý, qujattardy júıeleý, katalogtar uıymdastyrý isi ońtaılandyrylǵan. Bıyl 7342 oqyrman kitaphana esigin ashyp, 10084 kitap berilipti. Budan bólek 15 gazet-jýrnal jazdyryp alady. Ár jyl saıyn jańa ádebıettiń úsh júzden astam danasymen tolyǵyp otyrady.
Kitaphanashy Valentına oqyrmandarmen jandy baılanystyń jańa túrlerin barynsha ıgerýdi basty maqsat sanaıdy. «Týǵan eldiń Týy, Eltańbasy, Ánurany», «Olar Otan úshin shaıqasty», «Ana tiliń – aryń bul», «Bir el – bir kitap», «Kásibim osyndaı – ásker adam», «Gýsardan arnaıy jasaqqa deıin» taǵy súbeli taqyryptar boıynsha eske túsirý kórmeleri, aksııalar, dıalog alańdary, vırtýaldy saıahattar, únqatysýlar, vıktorınalar ótkizilip, beınerolıkter kórsetilip, oqýshylardy qazaqstandyq patrıotızm rýhynda tárbıeleý, Otanǵa qyzmet etý dástúrlerin jalǵastyrý, elin, jerin súıý, úlkenge qurmet, kishige izet, ımanı, adamı qasıetterdi baǵalaý sekildi tanymdyq mán-mańyzymen erekshelengen. Kitaphana janynda «Júrek qartaımaıdy», «Qasıetti otbasy», «Kıvıs» ardagerler, jastar, jasóspirimder klýbtary qurylǵan. Sálıma Jákenova, Tatıana Bataı, Lıdııa Salnıkova sııaqty eńbek ardagerleri baıyrǵy oqyrman retinde kitaptyń qadir-qasıetin nasıhattaýdan, atadan balaǵa mıras bolyp qalatyn asyl qundylyq ekenin aıtýdan, oqýǵa keńes berýden jalyqqan emes.
Kitaphanashy V.Pak turǵyndardyń bos ýaqytyn mazmundy da qyzyqty ótkizýge de ýaqyt taýyp, jańa formattaǵy aqparattyq tehnologııalardy barynsha paıdalanyp júr. Oqyrmandardyń úzilmeıtini de sondyqtan.
Soltústik Qazaqstan oblysy,
Aqqaıyń aýdany
