Elbasy, «Nur Otan» partııasynyń Tóraǵasy N. Á. Nazarbaev jarııalaǵan «Jastar jyly» aıasynda, «Jas Otan» JQ «Azamattyq bastamalardy qoldaý ortalyǵy» KEAQ jáne Aqparat jáne qoǵamdyq damý mınıstrliginiń qoldaýymen "Jastar Alany 2019" respýblıkalyq debat týrnıri atty áleýmettik jobasyn birlesip júzege asyrýda. Jalpy júlde qory 4 mln teńgeni quraıdy.
Jobanyń maqsaty - Qazaqstandaǵy debat qozǵalysyn jandandyrý jáne damytý, debat federasııasyn qurý.
Jaz boıy elimizdiń debaterleri týrnırge daıyndalyp, onlaın tirkelim jasady. Komıssııa týrnırge qatysý úshin 18-29 jas aralyǵyndaǵy qazaq lıgasynyń 40 komandasyn, orys lıgasynyń 20 komandasyn iriktedi. Týrnır alǵash ret ótkizilip otyrǵanymen qatysýshylar tarapynan jobaǵa úlken qyzyǵýshylyq tanytýda, al týrnır geografııasy elimizdiń barlyq óńirleri debat qozǵalysyna belsene qatysatynyn kórsetti. Joba aıasynda qatysýshylar úshin semınar trenıng ótkizildi. Týrnır jattyqtyrýshylary men tóreshileri jas debaterlerge keńes berip, negizgi erejelerin túsindirdi, jaǵdaılyq keısterdi taldap, halyqaralyq reglamentimen tanystyrdy. Arnaıy týrnır qatysýshylaryna arnalǵan eki tildegi ádistemelik materıaldarmen, sondaı–aq Amerıkandyq, Brıtandyq parlament jáne Lınkoln-Dýglas (LD) formatymen tanystyrdy. Basqa aımaqtardaǵy qatysýshy beıne baılanys arqyly trenıngke qatysa aldy.
Shadeeva Áıgerim, jattyqtyrýshy: - Meniń oıymsha, bul joba bizdiń eldegi debat qozǵalysyna úlken septigin berdi. Mektep, ýnıversıtet qabyrǵalarynda jas debaterler óse bastaıdy. Olar oıynnyń negizgi erejelerimen, formattarymen tanysady. О́z daǵdylaryn jetildiredi. Úzdikterdiń úzdigi budan ári respýblıkalyq jáne halyqaralyq deńgeıde oınaýǵa múmkindik alady.
Dáýlet Káribek, "Jas Otan" JQ tóraǵasy: - Osy týrnırdiń arqasynda jastar óz pikirlerin aıtyp, ustanymyn qorǵap, aqparatty taldaýǵa úırenedi. Atap ótken jón, debat qozǵalysyn tanytý maqsatynda, týrnırdiń fınaldyq oıyndary TV jáne ınternet keńistiginde kórsetiledi.
Aqtyq oıyndar 22 qyrkúıekte Nur-Sultan qalasyndaǵy «Oqýshylar saraıynda» ótedi. Sondaı-aq, týrnır qatysýshylary men qonaqtaryna arnalǵan belgili óner, ınternet jáne sport ókilderiniń qatysýymen debattan «Juldyzdy oıyn» kútip tur.
